Zgjedhjet lokale në Turqi u provuan të mos ishin të një formati lokalist, por një formë referendumi për politikat e ndjekura nga Presidenti Rexhep Tajip Erdagon. Harta turke e dalë nga zgjedhjet e fundit flet edhe për një fakt tepër interesant, për një rikthim në ngjyrimin laik të Turqisë së Ataturkut.
Kthimi i pjesës perëndimore të Turiqsë në bastione të republikanëve ataturkistë u kulmua me marrjen e Ankarasë dhe Stambollit. Për këtë “Qytetin e Botës”, ngadhënjimin opozitar mund ta përshkruajmë me vet fjalët e Erdoganit, “Kush fiton Stambollin fiton Turqinë”.
Dhe në këtë referendum, u ndeshën jo parti, por dy ideologji të ndryshme. Në njërën anë qe ideologjia republikane laike ose më saktë shtetformuesja e Turqisë Moderne dhe në anën tjetër ishte mbetja mesjetare-islamike e përfaqësuar nga Erdogani. Për të kuptuar se pse përbën kaq kosto shkatërrimtarë për Erdoganin humbja e zgjedhjeve, duhet të kuptojmë ofensivën erdoganiste kundër shtyllave laike të Turqisë, veçanërisht në fushat e kulturës dhe shkencës.
P.sh. heqja e teorisë së evolucionit të Çarls Darvinit nga kurrikulat shkollore të Turqisë, bazën kryesore të shkencës antropologjike dhe biologjike, s’mund t’i përngjante veçse një fermani të mbjelljes së injorancës.
Ideja e fundit e Erdognit për shndërrimin e monumentit botëror të Shen Sofisë në xhami, e cila u bë muze nga vetë Ataturku, flet për trajektoren mesjetare ku Erdogani planifikon ta degdis Turqinë. Orkestrimi i grushtit të shtetit dhe shndërrimi i Turqisë në një shtet-burg për gazetarë është një tjetër dëshmi që i bashkohet epitafit politik të Erdoganit. Por, mbi të gjitha, nëse qëmtojmë emëruesin e politikave neo-otomane, kuptohet se Erdogani po sulmonte pikërisht shtyllën vertebrale ku qëndron sot shteti modern turk i dalë nga Perandoria Osmane.
Prandaj, në këto zgjedhje lokale kemi një rikthim të frymës së Ataturkut ndër qytetarët turq dhe një kërrusje dhe rënie të polikave neo-otomane, zgjatimi i të cilës ka ndikuar me pasoja të mëdha për Shqipërinë, Kosovën, Maqedoninë dhe Bosnjë Hercegovinën.