Nga Kastriot Dervishi

Bajram Shaban Danushi, 33 vjeç nga Tomori i Beratit; Asqeri Arif Gorica, 38 vjeç nga Berati; Myslim Asim Toska, 33 vjeç nga Luari i Roskovecit, u arrestuan më 12.8.1960, të akuzuar në bazë të nenit 73/1 të Kodit Penal për agjitacion e propagandë. Myslimi kishte vuajtur më parë një dënim prej: 11 vjetësh, 10 muajsh dhe 19 ditësh. Së bashku me dënimin e dytë, ai vuajti 18 vjet, 4 muaj, 26 ditë burgim. Në vendimin e gjykatës për ta thuhej:

“Të tre të gjykuarit kanë pranuar në hetuesi dhe në gjyq se kanë agjituar dhe propaganduar kundër pushtetit popullor. Ata kanë pranuar se janë mbledhur në shtëpitë e njëri tjetrit dhe në prezencë të personave të tjerë kanë komentuar lajme e shtypit tonë në të kundërtën, kanë dëgjuar dhe komentuar “Zërin e Amerikës”, kanë ngritur shëndete në raki për përmbysjen e pushtetit popullor, kanë treguar në persona të tjerë, fotografi të të arratisurit politik Nezir Danushi, për të treguar se jeta në shtet kapitaliste është më e mirë”.

Gjykata e Qarkut Vlorë (Dega e Beratit), me vendimin nr.9, datë 10.11.1960, i deklaroi fajtorë dhe i dënoi me nga 10 vjet burgim dy të parët dhe me 8 vjet Myslimin. U la në fuqi me vendimin nr.205, datë 24.12.1960 të Këshillit Gjyqësor Penal të Gjykatës së Lartë.