Kryetari demokrat, Sali Berisha, u ndal në takimin me krerët e degëve edhe te çështja e Ballkanit të Hapur.
“Le të ndalem edhe njëherë te Ballkani i Hapur. Është akti më i lartë i tradhtisë që i është bërë kombit shqiptarët.
Shqiptarët sot kudo janë, i detyrohen Albin Kurtit mbrojtjen ndaj një projekti që vendos hegjemoninë e pastër serbe.
Nga një projekt, që në vend të sanksionojë bashkëpunimin mes kombeve të barabarta, sanksionon poshtërimin e Kosovës dhe rrethimin e saj armiqësor nga Beogradi, nga Beogradi i vogël, që është Tirana, me qëllimin më antishqiptar, për ta paraqitur Kosovën si sherrin e Beogradit. Ndërkohë që sherri i Ballkanit është Beogradi.
Revista ‘Economist’ thotë se nga projekti i Ballkanit të Hapur përfiton vetëm Serbia. Të jeni të sigurt se ajo është jashtëzakonisht e paanshme.
Por kjo seri gënjeshtarësh, apatridësh që bëjnë avokatinë e këtij projekti, u them atyre që të citojnë një nen të këtij traktati. Sepse nuk është publikuar kurrë. A nuk deklaroi Vuçiç në Beograd se traktati është 740 faqe. Kush e ka parë këtë? Kush e ka lexuar? Çfarë ka në faqet e këtij traktati të këtij gangsteri? Askush nuk e di. Megjithatë nuk mungojnë gazetarët apatridë, injorantë. I gjithë rrjeti i Sorosit është ngritur në këmbë për të mbështetur Ballkanin e Hapur.
Çdo fermeri duhet t’i shkojmë në shtëpi dhe t’i themi se çfarë mynxyre është Ballkani i Hapur. Se si mund të matet ai me fermerin serb, që merr 80 euro subvencion për hektar, kurse ky këtu nuk merr as dy euro për hektar.
Këta xhahilë që bëjnë avokatinë e këtij projekti dhe flasin për tregtinë e lirë, këta nuk dinë absolutisht se çfarë është tregtia e lirë. Këta dinë vetëm çfarë është Beogradi dhe Sorosi.
Në rrafshin politik, Ballkani i Hapur është kundërvënie flagrante ndaj Procesit të Berlinit. Kjo sepse është projekt rus. Është thënë disa herë dhe u vulos nga Sergei Lavrov. Hegjemoni serbe do të thotë influencë ruse. Për këtë po punon Edi Rama. Mund ta përgënjeshtrojnë dot Lavrovin? Asnjë njeri nuk e përgënjeshtron dot.
Në këtë kontekst, PD është në një mision të madh, jo vetëm në mbrojtjen e interesit kombëtar, por edhe në mbrojtjen e çdo prodhuesi në vend,” tha Berisha
