Krerë të disa qeverive të Ballkanit, përfshi atë të Kosovës, Ramush Haradinaj, si dhe përfaqësues të Shkupit dhe Sofjes do të bëhen bashkë të hënën në Tiranë në kuadër të një takimi për luftën kundër terrorizmit.

Ata do të priten nga Kryeministri i Shqipërisë, Edi Rama në kuadër të Aqaba Meeting, ose Takimet e Akabës, një iniciativë e Mbretit të Jordanisë, Abdullah, që për herë të parë organizohet jashtë vendit të tij që prej themelimit në vitin 2015.

Vetë Mbreti Abdullah i Jordanisë ishte parashikuar që të vinte në Tiranë për të marrë pjesë në bisedimet dhe takimet kundër terrorizmit, por zhvillimet e brendshme në Jordani, duket se kanë ndryshuar planet e tij dhe në Shqipëri pritet të mbërrijë një këshilltar i Mbretit, princi Ghazi Bin Muhammad, raportojnë mediat vendase.

Takimi në Tiranë pritet të ndiqet nga 200 pjesëmarrës, politikanë, ekspertë sigurie, liderë fetarë dhe akademikë. Lufta ndaj ekstremizmit të dhunshëm është një nga tryezat e organizuara së bashku nga Qeveria e Shqipërisë dhe ajo e Holandës.