Opozita i kërkoi Prokurorisë të hapë hetim penal ndaj Kryeministrit Edi Rama për pengim të së vërtetës, duke mos dorëzuar “provën” e përgjimit që implikon vëllain e Ministrit të Brendshëm, Agron Xhafaj, të cilin ai pretendon se e ka bërë në “një nga laboratorët më të mirë të botës”. 24 orë pas denoncimit të PD-së, Edi Rama tha se përgjimi ishte montazh, pa e pasur materialin në dispozicion.

Kryetari i Grupit të PD, Edmond Spaho dhe kryetari i Grupit të LSI, Petrit Vasili, deklaruan se Rama duhej ta dorëzonte ekspertizën që i bëri audipërgjimit të Xhafajt ndryshe ai duhej të akuzohej për pengim të së vërtetës.

“Kërkojmë hetim penal ndaj Ramës për pengim të të vërtetës, për fshehje të të vërtetës duke mos dorëzuar provën e ekspertimit në një nga laboratorët më të mirë të botës”, u shpreh kryetari i Grupit Parlamentar të PD-së Edmond Spaho në një deklaratë për median.