Tashmë ne shqiptarët asgjë nuk çudit për veprimet që ndërmerr kjo me nder klasë politike që vetë ne e kemi venë në krye të vendit. Edhe pse çdo ditë ajo di vetëm të na varfërojë, të na plaçkitë e të na mashtrojë.
Kjo me nder klasë politike asgjë të hajrit nuk di të molloisë në shërbim të shqiptarëve. Ndaj ata, largohen, vetëm largohen. Sot, e vetmja krenari na ka mbetur: deri tani janë larguar 1,5 milion shqiptarë. Janë ata që po I mbajnë shqiptarët e shkretë që kanë mbetur këtej kufirit.
Kjo me nder klasë politike e di shumë mirë se shqiptarët nuk I besojnë, se shqiptarët po të mundin ia bëjnë me nderën sa hap e mbyll sytë. Ndaj ata për të ruajtur pushtetin e tyre familjar, c’nuk po bëjnë duke iu lëpirë miqve ndërkombëtarë. Thjesht sepse mendojnë se, kështu do të mund ta ruajnë pushtetin e tyre familjar që ua mundësojnë pasurimin dhe kthimin e shpejtë më milionerë.
Shqiptarët e shkretë të mbytur në varfëri, asnjë fjalë a mendim të tyrin nuk e beson. Ndaj e vunë menjëherë në dyshim çfarë kjo klasë politike u kujtua një mbrëmje vere se, “shqiptarët do ta ndihmonin Italinë duke strehuar 20 emigrantë që janë bllokuar në anijen “Diciotti”, emigrantë që prej ditësh janë bllokuar e nuk mund të zbarkojnë në tokë.
Vetë Ministri I brendshëm i Italisë ia ka bërë të ditur Evropës se, Shqipëria, një vend ende jashtë BE-së, është vendi i parë që i afroi Italisë ndihmë për strehimin e 20 emigrantëve, nga rreth 150 emigrantë që ishin bllokuar në atë anije prej ditësh.
Se shqiptarët janë mikpritës të hallexhinjve të rënë në varfëri, këtë e kanë treguar mëse një herë. Aq sa një prej qyteteve të këtij vendi. Kukësi ishte edhe kandidat për çmimin Nobël të paqes në vitin 2000.
Shqiptarët janë mikpritës të hallexhinjve, po kur këtë e artikulon kjo klasë politike, askush nuk e beson. Sepse është kjo klasë politike që as nuk do t’ia dijë se çfarë ndodh me vetë shqiptarët sa herë bien në hall. Nuk ia ndjen, po vetëm I mashtron, bie fjala sa herë përmbyten, apo kur kanë hall tjetër.
Është më shumë se e neveritshme që kjo klasë politike, ndërsa na rrit taksat e llojet e saj, as nuk I shkon mendja të na rrisë pagat me justifikimin se, “nuk ka buxhet të mjaftueshëm”. Po kur s’ka buxhet për të vetët, ku do të gjejë buxhet e shpenzime të tjera që të mbajë edhe 20 emigrantë, ndërsa mban afro 3000 muxhahedinë dhe qindra emigrantë të tjerë, numri I të cilëve nga dita në ditë po shkon duke u rritur.
Kjo klasë politike është e para që tregohet e gatshme të marrë e të strehojë emigrantë, jo se asaj i plas shumë me ndera, po sepse kështu ajo mendon se tregohet e afërt me miqtë Evropianë, fiton besimin e tyre, kur e di mirë se vetë shqiptarët ndjejnë jo pak neveri për çfarë bën ajo, përderisa shqiptarët vetëm po i varfëron. Është një përfaqësues i kësaj me nder klase politike, ministri i Financave që na brockullit në vesh, se “kemi një rritje ekonomike 4,5 herë më të lartë se në vitin 2013”. A ka shqiptar që e beson një idiotizëm të tillë me brirë, kur secili shqiptar sheh në sofrën e tij se si po varfërohet nga dita në ditë.
Ndoshta, është ky pohim idiot që e bën klasën politike t’i besojë vetvetes, se jemi duke u pasuruar, ndaj edhe mundemi t’i vijmë në ndihmë BE-së duke marrë emigrantë për t’i strehuar.
Gjithë shqiptarët e dinë mirë sa herë ka patur përmbytje u është premtuar ndihmë nga qeveritarët. Po deri tani, gjithçka ka rezultuar vetëm mashtrim. Vetë shkodranët vazhdojnë të përsërisin se, ende nuk kanë marrë dëmshpërblimin për përmbytjen e dimrit të vitit 2010. Pale më për përmbytjet e tjera që tashmë janë bërë të përvitshme. Ndaj kjo qeverisje vështirë të besohet se mund të ndihmojë ndokënd, kur nuk ndihmon as shtetasit e vet. Këtë po e shohim edhe këto ditë, kur disa familje matjane e bulqizake u dëmtuan nga tërmeti, po deri tani askush nga qeveria, apo nga Rilindja nuk hap gojën të tregojë si do t’i ndihmojë hallexhinjtë. Kur nuk di të flasë për njerëzit e vet si guxon e flet për hallexhinjtë e shumtë nëpër botë ?
Natyrisht kërkesa e shprehur nga Ministri I Evropës dhe I Punëve të Jashtme shkodranit Ditmir Bushati, nuk zgjidh problemet e BE-së për emigracionin. Ne, mund të strehojmë 20 emigrantë, po nuk dimë të zgjidhim problemin e fluksit të emigrantëve shqiptarë që dynden pa u ndalur në Evropë. Drejt Evropës po dynden i madh e i vogël nga kjo Shqipëri që po dergjet në një varfëri ekstreme. Është ky problemi kryesor që duhet të artikulojë kjo klasë politike, një problem që po zvarritet nga viti në vit pa gjetur zgjidhje. Aq sa sot janë me dhjetëra edhe fëmijë që nga vetë prindërit braktisen në BE, me të vetmin synim: të ndërtojnë jetën atje. Sepse në këtë vend me emrin Shqipëri, thuajse të gjithë kanë humbur shpresën se mund të ndërtojnë një jetë të mirë. Ndaj të gjithë duan të ikin. Veç, grupit oligark të politikanëve të pashpirt, natyrisht.
Është rasti që ne shqiptarët të tregojmë ndjesinë tonë për t;ua ardhur në ndihmë hallexhinjve. Ta tregojmë vetë ne, pasi kjo klasë politike do ta shfrytëzojë vetëm në interesin e saj, që të mbrohet nga BE, kur të gjithë e shohin se atë në radhë të parë, nuk e duan vetë shqiptarët, bile tashmë në një masë të madhe edhe e urrejnë. Sepse ajo po u sjell shqiptarëve të ngratë vetëm varfëri. Ndaj dhe askush prej tyre nuk I beson. Edhe kur artikulon pa dashje ndonjë të mirë si, ajo për të marrë nën mbrojtje 20 emigrantë. Ilirian Demiri
