Kryetarja e Lëvizjes Socialiste për Integrim, Monika Kryemadhi, e ftuar në rubrikën “Opinion” në studion e lajmeve në News24, ndër të tjera ka folur edhe për sa i përket audio-përgjimit të të dërguarit të Edi Ramës, Denar Biba, për shantazhin ushtruar ndaj gjyqtarit të Strasburgut, Ledi Bianku.

Kryemadhi tha se është fatkeqësi fakti se si skandalet janë kthyer në normalitet e nuk i bëjnë më përshtypje.

“Nuk më bën përshtypje fare mua, skandalet janë kthyer në normalitet. Reagimi më i madh vjen nga gjykata e Strasburgut, e cila ka kthyer mbrapsht kandidaturat e çuara nga Shqipëria, se kur qeveria kërkon të manipulojë një gjyqtar në Strasburg për t’u marrë shtëpitë shqiptarëve, normal që do e humbin besimin. Ne kemi një kryeministër që ka kapur shtetin, dhe kontrollohet nga bandat kriminale. Ky njeri o është i çmendur, ose fijet e tij shkojnë shumë më larg se krimi organizuar. Se të kërkosh të manipulosh gjyqtarin e Strasburgut është përtej çmendurisë, ka kaluar çdo kufi të imoralitetit,” tha Kryemadhi.