Raportuesi për Shqipërinë në Parlamentin Europian Knut Fleckenstein thotë se do të zhvillojë një takim me kreun e opozitës Lulzim Basha për t’u njohur me propozimin e opozitës për vettingun në politikë.
Në një intervistë ekskluzive për gazetaren e Radio Televizionit Shqiptar në Bruksel Arta Tozaj, Fleckenstein thotë se iniciativa është dicka interesante.

KF: Unë nuk mund t’i ndjek realisht ata kur flasin për vonesa të mëdha, apo probleme në procesin e vetingut, pasi ka gjithnjë diçka që do shtyhet, apo diçka që nuk shkon kur vihet në zbatim. Sa i përket vetingut të politikanëve, kjo është diçka që nuk e kam dëgjuar kurrë më parë dhe mendoj se është një ide interesante, ndaj dhe unë po pres me padurim për vizitën e radhës në Shqipëri, në Nëntor, për të pyetur vetë zotin Basha se çfarë fshihet aty e se cili është këndvështrimi i tij mbi këtë problem. Mbase do të mund të mësoj diçka.

Teksa pyetet për përmbushjen e rekomandimeve të OSBE-së në përmirësimin e Kodit Zgjedhor, Fleckenstein i fton partitë politike të bashkëpunojnë në realizimin e saj.