Rama, kur është në hall, s’ka nevojë as për portale e as shkrimi për ta zbërthyer sa keq është. Plastika  e fytyrës dhe metabolizmi i tij e tradhton, si ajo që pamë në mbledhjen me policinë e shtetit. Së fundmi kemi parë një Edi Ramë të çartisur e të përhumbur në ato skuta psikike, që mendja i krijon kur njeriun e zënë ngushtë hallet. Interesant për t’u trajtuar si temë diplome nga studentët e psikologjisë, ky Ramë u shfaq në emisionin “Dritare” i katandisur në gradën e fundit, sikur ishte liruar nga këmisha  e forcës e gati-gati sa nuk i dhunoi gazetarët. Fshikullonte me duar, përqeshte moderatoren me mimike e zë femëror, shpërdridhej me turp, shfryhej e fryhej.

Përnjemend, një hall të madh na ka trazuar kryeministrin. Shumë menduan për sikletin e Taullant Ballën, disa nga marazi për Sajmir Tahirin, por na dilka se shërbimet e huaja paskan njoftuar policinë shqiptare për ekzistencën e një fabrike heroinë në Has dhe kanë zbarkuar vetë për ta çmontuar, natyrisht për shkak të mosbesimit ndaj policisë së Ramës,

 Dhe më interesante bëhet kur mendon se këtë kryeministër të trazuar e kemi parë edhe njëherë tjetër kaq rëndë, pak ditë para se të zbulohej nga shërbimet e huaja fabrika e kokainës në Xibrakë. Nëse do të shihni paraqitjen e Ramës para operacionit të Xibrakës, është i njëjti me atë që bëri kur nxori kokën në “Dritare” apo kur kulloi në djersa të ftohta para policive.

Kur fabrikat e drogës mbijnë më shumë sesa fasoneritë, Edi Ramës tani ja kuptojmë djersët  dhe paketën anti-shpifje. Shërbimet prestigjioze të huaja anti-drogë e kanë zbuluar se ai është merimanga që ka lëshuar rrejtën e drogës në vend. Hilet që bën me policinë, kur në njërën anë  njofton për ekzistencën e operacionit e pastaj në mënyrë zyrtare u bën thirrje medieve të mos raportojnë gjë medemek se cenohet operacioni, është një konfirmim tjetër sesa cullak ka dalë kryeministri.