Presidenti i Republikës Ilir Meta, gjatë një vizite në Pogradec, është ndalur ndër të tjera edhe tek Vetingu në Politikë, draftpropozimi i cili sot u rrëzua nga maxhoranca.
Ai shprehet se vetingu në politikë është i domosdoshëm dhe duhet gjetur gjuha e përbashkët për realizimin e tij.
“Mesazhi është që reforma në drejtësi duhet bërë seriozisht. Vetingu është i domosdoshëm dhe duhet gjetur mënyra për realizimin e tij në mënyrë që të kermi ndarje të qartë të politikës dhe aktiviteteve kriminale”, tha Meta.
Më tej ai u ndal edhe tek dëbimi i ambasadorit iranian, ku tha: “Jam tërësisht aprovues ndaj vendimit të Ministrisë së Jashtme”.
Ndërsa komentoi miratimin e datës së zgjedhjeve ndërsa nuk kemi ende një reformë zgjedhore, Meta tha se jemi të vonuar dhe apelon që të arrihet sa më shpejt një marrëveshje.
“Padyshim jemi të vonuar me reformën zgjedhore dhe apeloj që të arrijmë sa më shpejt një marrëveshje për të kthyer besimin për zgjedhje të lira”, – tha Presidenti.
Në vijim ai u ndal edhe tek protesta e studentëve ku tha se është e domosdoshme që kërkesat e tyre të marrin zgjidhje.
“Është e domosdoshme që kërkesat e tyre të marrin zgjidhje, sepse të gjithë i vlerësojnë si të drejta dhe legjitime, në mënyrë që pastaj ata t’i kthehen auditoreve të tyre me besim dhe entuziazëm për cilësinë e arsimit të tyre. Por edhe për të ardhmen e tyre në këtë vend”, – deklaroi Presidenti Meta.
Prononcimi i Presidentit Meta në Pogradec
21 dhjetor 2018
Pyetje: Zoti President, një ditë më parë Kuvendi ka rrëzuar dekretin e ligjit për tatimin mbi të ardhurat. Si e komentoni faktin që është përpjekur ta votojë në fshehtësi, në ilegalitet të plotë dhe menjëherë?
Presidenti Meta: Nuk besoj të ketë ndodhur, sepse ka rregulla mjaft të qarta se si funksionohet në Kuvend në raste të tilla. Dhe përfaqësuesit e Institucionit të Presidentit, që ka kthyer këtë projektligj përmes dekretit, ende nuk janë ftuar për të dhënë shpjegimet dhe argumentet e tyre.
Pyetje: Ju keni mendimin që klasa e pasur të tatohet akoma edhe më shumë. Kuvendi ka tjetër mendim zoti President?
Presidenti Meta: Kemi ardhur për “Festën e Verës” këtu në Pogradec, dhe besoj që është një mbrëmje që duhet t’ua kushtojmë prodhuesve të vegjël e të mesëm të Pogradecit.
Pyetje: Një koment tuajin për protestën e studentëve?
Presidenti Meta: Besoj se ju i dini qëndrimet e mia për këtë çështje. Është e domosdoshme që kërkesat e tyre të marrin zgjidhje, sepse të gjithë i vlerësojnë si të drejta dhe legjitime në mënyrë që ata t’u kthehen auditorëve të tyre më me besim dhe entuziazëm për cilësinë e arsimit, por njëkohësisht edhe për të ardhmen e tyre në këtë vend.
Pyetje: Zoti President, mbi “vettingun” në politikë, duket sikur dy forcat politike janë të dyzuara. Ju a keni një mesazh?
Presidenti Meta: Mesazhi është që reforma në drejtësi duhet bërë seriozisht. Kushtetuta duhet respektuar seriozisht. Dhe vettingu është i domosdoshëm dhe duhet gjetur mënyra për realizimin e tij që të kemi një ndarje të qartë të politikës nga aktivitetet kriminale.
Pyetje: Për largimin e ambasadorin iranian?
Presidenti Meta: Për këtë çështje jam tërësisht aprovues ndaj reagimit të Ministrisë sonë për Europën dhe Punët e Jashtme.
Pyetje: Ju keni miratuar datën e zgjedhjeve vendore të vitit 2019, por nuk kemi ende një reformë zgjedhore. Mendoni se është e vonuar?
Presidenti Meta: Padyshim që jemi të vonuar dhe unë apeloj për të arritur sa më shpejt një marrëveshje, që rikthen besimin te zgjedhjet e lira për të gjithë qytetarët shqiptarë.
Pyetje: Kjo klasë politike do të jetë e përgjegjshme për ta arritur këtë?
Presidenti Meta: Ne inkurajojmë përgjegjshmërinë maksimale, sepse kjo bëhet për interesin e vendit dhe shpresojmë se interesat e politikës të mos cenojnë interesat e vendit, por të mundohen t’u përgjigjen atyre me përgjegjshmëri të plotë.
