Gent Cakaj, djaloshi lindur e rritur në Kosovë, të cilin Edi Rama e ka përzgjedhur si Ministër të Jashtëm të Shqipërisë, në vendlindjen e tij njihet si “djali i birësuar i Baton Haxhiut”. Madje, portali “kukunews”, në një tregim humoristiko-politik, tregon se si drejtori i Klan Kosova dhe njëkohësisht këshilltari më i ngushtë i Edi Ramës, iu drejtua familjarëve të Cakaj për ta birësuar zyrtarisht.
Përtej kësaj situate humoristike nga Kosova, caktimi i Gent Cakaj në postin e kryediplomatit shqiptar nuk është aspak për të qeshur. Përkundrazi, situata mund të rezultojë shumë serioze për diplomacinë shqiptare, si edhe për rolin e saj në rajon e më gjerë.
Gent Cakaj është një investim politik i Baton Haxhiut tek Edi Rama. Fillimisht, analisti i ri politik u promovua në studiot e Klan Kosova të drejtuar nga Haxhiu e më pas, po nëpërmjet kësaj lidhje, Cakaj emërohet zëvendësministër i Jashtëm në dikasterin e drejtuar deri më tani nga Ditmir Bushati. Në janar të vitit 2018, ai merr shtetësinë shqiptare.
Shumë shpejt Cakaj pritet të marrë çelësat e zyrës së Bushatit, duke nxitur dyshime në radhët e diplomatëve dhe politikanëve shqiptarë në të dy anët e kufirit. Gent Cakaj ka disa probleme individuale, si mosha e re, mungesa e përvojës, përdorimi i dobët i gjuhës angleze, shumë e domosdoshme në pozicion e tij, si edhe mos-pajisjen me “certifikanë sigurie”, e nevojshme për pjesëmarrje në takimet e ministerialeve të NATO-s.
Por, këto mangësi individuale të kandidatit të Ramës për Ministër të Jashtëm mund të jenë të rikuperueshme. Ajo që shqetëson diplomatët në Tiranë e Prishtinë është qëndrimi që ai do të mbajë, sidomos për çështjen e teorisë së Presidentit të Kosovës, Hashim Thaçi për “korrigjimin e kufijve me Serbinë”, e cila nuk është gjë tjetër vetëm se një plan për shkëmbimin e territoreve mes dy vendeve.
Teoria e “shkëmbimit të kufijve” mbështetet fort nga dy persona në Kosovës-Thaçi dhe Baton Haxhiu, “mentori” i ministrit të ri të Jashtëm shqiptar, Gent Cakaj. Në një opinion, publikuar në Gusht 2018 në median kosovare, Baton Haxhiu ka deklaruar se “Veriun e Kosovës duhet ta lëmë të ikë”.
Kjo qasje e Thaçi-Haxhiu kundërshtohet fuqimisht në politikën kosovare. Por, nga Tirana zyrtare, nga vetë Edi Rama, ka një heshtje shurdhuese mbi këtë çështje. Për shumëkënd, qëndrimi neutral i Ramës është një dëshmi se ai është në favor të tezës së mbrojtur nga Hashim Thaçi e Presidenti i Serbisë, Aleksandër Vuçiç, për “korrigjimin e kufijve” (lexo: shkëmbim territoresh).
Qëndrimi i Edi Ramës “pro” projektit Thaçi-Vuçiç forcohet akoma më shumë nga fakti se “kumbari” i diskutimeve ndërmjet presidentit kosovar e atij serb është miku i kryeministrit shqiptar, Xhorxh Soros, nëpërmjet levave të tij në Ballkan.
Me logon “Soros” lidhet edhe vetë Ministri i ri i Jashtëm, Gent Cakaj. Ne media jane publikuar gjatë ditës së Premte të dhëna që lidhin Cakaj me KFOS (Fondacioni Shoqëria e Hapur për Kosovën-Soros).
Në këtë pikë, “puzzle” bëhet më i plotë. Kryeministri Edi Rama, mik i Sorosit, nëpërmjet këshilltarit të tij Baton Haxhiu, nxitës i paktit Thaçi-Vuçiç për shkëmbim territoresh, I konsideruar në Kosovë edhe si “spiun i serbëve”, emëron Ministër të Jashtëm Gent Cakaj, pinjoll i Soros-it dhe “beniamin” i Haxhiut.
Diplomacia shqiptare ka një rol thelbësor në çështjet rajonale e sidomos ato që lidhen me Kosovën. Diskutimet për shkëmbim territoresh kanë përfshirë një numër të lartë zyrash diplomatike ndërkombëtare, të cilat, natyrisht, diskutojnë edhe me autoritetet shqiptare qëndrimet e tyre mbi këtë çështje.
A do të jetë Gent Cakaj një “informues” për autoritetet serbe dhe Soros-in mbi qëndrimet dhe opinionet e zyrtarëve ndërkombëtarë për tezën Thaçi-Vuçiç për “korrigjim kufijsh”? Ky është shqetësimi real që kanë sot diplomatët shqiptarë e kosovarë, të cilët njohin qëndrimin e Edi Ramës e Baton Haxhiut mbi projektin e presidentëve të Kosovës e Serbisë.
