Kryetarja e LSI-së, Kryemadhi, ka uruar që viti 2019-të të jetë sa më i mbarë dhe i begatë për shqiptarët.

Ajo uron gjithashtu që shpirti i protestës të shoqërojë çdo ditë të gjithë ata që nuk mund të durojnë më qeverisjen e papërgjegjshme të Edi Ramës.

Kryemadhi thekson se është koha që të gjithë të përpiqemi e të ndihmojmë në largimin e kryeministrit, që është përgjegjës kryesor për situatën në të cilën ndodhet Shqipëria.

“Çdo vit meriton një urim në zanafillën e tij. Qoftë 2019 vit i mbarë dhe i begatë për shqiptarët! Urimet e politikanëve zakonisht janë pjesë e protokolleve, që nuk lexohen asnjëherë nga fillimi në fund.

Ndaj për këtë, sot si nënë, dua t’ju uroj të gjithë familjeve shqiptare; qofshi çdo ditë të vitit, që sapo ka hyrë, të paqtë e të gëzuar, iu realizofshin të gjitha dëshirat dhe ëndrrat fëmijëve tuaj. Si grua dëshiroj sa më shumë integritet e forcë për zonjat dhe vajzat shqiptare, që janë motorri dhe frymëzimi në familje dhe shoqëri.

Dhe si politikane, uroj dhe shpresoj që ky vit të jetë i duhuri, për të sjellë më shumë siguri e jetë të mirë për qytetarët shqiptarë. Shpirti i protestës shoqëroftë çdo ditë të gjithë ata që nuk mund ta durojnë më këtë qeverisje të papërgjegjshme. Është koha që të gjithë të përpiqemi dhe të kontribuojmë për largimin e Edi Ramës, përgjegjësit kryesor për situatën e paprecedentë në të cilën ndodhet Shqipëria.

Qoftë 2019-a viti i ndërgjegjësimit dhe revoltës qytetare, për ti dhënë shpresë fëmijëve të shqiptarëve që Shqipëria do të bëhet një ditë vendi nga i cili jo të gjithë do të duan të largohen sa më parë. Nga mot gëzuar e me Shqipërinë që meritojmë!” – shkruan Kryemadhi në “Facebook”.