Për të çuar në vend një fiksim, kryeministri i fiksimeve, ai që nuk qeveris, por flet e nuk mblidhet nga mëngjesi deri në darkë, shpalli publikisht delegimin e funksionit të ministrit për Europën dhe Punëve të Jashtme, te një çunak pa përvojë. Përveç fiksimit, karakteristikë e stilit të tij të punës, mbase ka edhe ndonjë arsye tjetër të cilën Rama nuk e thotë. Delegimi i kompetencave bëhet në rastet kur titullari për arsye sëmundje, pushimi, vizite, etj është i pamundur ta ushtrojë detyrën, por kurrsesi për eksperimente. Siç kanë ardhur punët, i bie që deri në fund të mandatit të kësaj qeverie, ministri që mbulon punët e jashtme të mos jetë i pranishëm në Kuvendin e Shqipërisë, por të ndjekë punimet në kushte ilegaliteti. Homologet e ministrit që mbulon punët e jashtme kanë gjithë të drejtën ta shmangin atë nga takimet zyrtare pasi nuk është i njëjti nivel përfaqësimi. Po ashtu nuk ka tagrin e duhur për të nënshkruar dokumente të rëndësishme. Cakaj do jetë një ushtrues detyre papërvojë i izoluar. Me kaq pak gjëra, Rama i ka dhënën ngjyrën më joserioze shtetit shqiptar. Shumë shpejt do ta kuptojë që veprimi i tij nuk do rezultojnë veçse një karagjozllëk që nuk bëhet me shtetin. Është i njohur fakti se ai nuk ka koncepte shtetformimi, pasi udhëhiqet nga fiksimet dhe fasada. Rama e kupton qeverisjen një pllakë gramafoni që nuk pushon, por nuk bën asgjë tjetër.