Nënkryetari i Bashkisë së Tiranës Arbian Mazniku, është përballur me studentët dhe pedagogët e UBT-së, i cili ka sqaruar se shkolla do të ndërtohet pasi fëmijët e zonës nuk kanë se ku të arsimohen. Sipas Maznikut, bashkia po përpiqet që tokën private pranë UBT-së e cila është kthyer në tokë publike ta vërë në shërbim të shkollave.

“Nuk ka një konflikt mes shkollës dhe zonës që ne po flasim, zona ka nevojë imediate për ndërtimin e një shkolle, ne po bëjmë fjalë për ndërtimin e e shkollës në 8 mijë metra katrorë, ndërsa pjesa tjetër nuk preket. Po flasim për kthimin e një zone nga private në publike, dhe nuk do të prekim asnjë fije të universitetit. Do funksionojë në mënyrë të tillë që të mos cënohet asnjë centimetër tokë.

Ndërkaq pedagogu Lush Susa ka ndëhyrë për t’i sqaruar nënkryetarit të Bashkisë se ky ndërtim cënon universitetin.

“Ti po hoqe këta, hoqe universitetin. Ju po prekët universitetin e keni shkatërruar, unë mbroj interesin publik. Të kishit ardhur para 3 muajsh. Kur Rama doli unë e përgëzova. Duam të na ndihmoni, jo të na shkatërroni. A keni fëmijë? Votova për ju, që mu thaftë dora! A doni që fëmijët tuaj të ikin në emigracion? Ju ardhtë zoti dorën të gjithë atyrë që bëjnë këtë gjë?”.

Ndërkohe nënkryetari Mazniku ështe përgjigjur:
“Profesor siç thatë edhe ju a keni fëmijë, edhe unë këtë po ju them a keni ju fëmijë?Ju thoni a keni fëmijë po këta banorë të kësaj zone a kanë fëmijë? A duhet që banorët e kësaj zone të arsimohen? Që këta banorë të zonës nuk kanë se ku t’i çojnë fëmijët e tyre, ku t’i arsimojnë, ju kemi dhënë 1 milion euro për fermat. Ne po e kthejmë këto tokë në funksion të arsimit dhe ju siguroj që kjo nuk do të prekë asnjë fije nga UBT.

Siç e shihni mbrapa toka është një djerrinë me plehra nuk ka as ullinj asgjë, nga 110 mijë metra tokë do ju marrim vetëm 8 mijë metra katrorë për të ndërtuar shkollën”-u shpreh ai.