Kryetari i PD-së, Lulzim Basha, gjatë fjalës së tij si i ftuar i Institutit Ndërkombëtar të Studimeve për Lindjen e Mesme dhe Ballkanin në Lubjanë të Sllovenisë, ka prekur disa tema, që në Shqipëri janë mës aktuale.

Sipas kreut të opozitës, imediate në vend është rikthimi funksional i Gjykatës Kushtetuese, ndërsa ka folur edhe një herë për aktin e djegies së mandateve parlamentare.

“Ne ndërmorëm një akt ekstrem, duke djegur mandatet, për ti rënë kambanave të alarmit ndaj krimit dhe korrupsionit të lidhur me qeverinë. Për shtetin e të drejtës dhe të një shteti që lufton krimin dhe korrupsionin. Ky akt, sigurisht që ka riskun e tij, por mungesa e Gjykatës Kushtetuese nuk na la zgjidhje tjetër”, u shpreh Basha.

Sipas Bashës, e gjithë kjo lëvizje politike nuk synon thjesht karriken e pushtetit, por dhënien fund të tranzicionit politik në Shqipëri.

“Kërkojmë zbatim real të ligjit, jo fals, zgjedhje të vërteta dhe jo false, një parlament ku qeveria jep llogari dhe jo një media të lirë dhe të pavarur, jo liri false, Kjo është diçka më shumë se zgjedhjet e rradhës. Partia ime nuk ka lindur si parti e zakonshme, lindi si lëvizje e Rinisë, ne nuk synojmë thjesht pushtetin, por dhënien fund të tranzicionit”, është shprehur kreu i PD-së, Lulzim Basha.