Edi Rama tashmë është shndërruar në një kryeministër ‘fuqiplotë’, i cili pasi ka hipur në majë të pemës së pushtetit duke i prerë një nga një të gjitha degët që e ndihmuan të ngjitet në majë, nuk ka rrugë tjetër veçse rrëzimit të turpshëm.
Rama preu degën e parlamentarizmit, duke vazhduar të quajë ‘normal’ një Parlament njëpartiak të maskuar në mënyrë qesharake me një ‘opozitë’, që nuk përfaqëson asgjë. Gjithashtu kulmin e arriti kur preu ‘degën’ e pluralizmit, duke zhvilluar zgjedhje lokale monopartiake dhe duke marrë në një dorë edhe gjithë pushtetin vendor. Ndërkohë vazhdon të hiqet, sikur ky është një ‘normalitet’.
Edi Rama, nuk njeh më institucionin e presidentit dhe po vrapon që në mënyrë antikushtetuese ta rrëzojë edhe atë përfundimisht, edhe pse një gjë të tillë e ndan vetëm Gjykata Kushtetuese, e cila po për meritën e tij, prej gati 2 vitesh është eliminuar.
Kryeministri nëpërmjet PPP, koncesioneve dhe tenderave korruptiv në vlera qindra milion euro, ka ‘prerë’ edhe degën e Ekonomisë. Sot është në fazën që nuk ka më fuqi likuiduese, as për blerjen e energjisë elektrike në këtë thatësirë të madhe dhe madje po shkon me shpejtësi edhe te mos mundësia e likuidimit të pagesave për administratën; mjekët; mësuesit, policët etj. Prandaj ka nisur të ashtuquajturin ‘aksion kundër informalitetit’, i cili po godet me aksion biznesin me vetëm një qëllim; mbushjen me urgjencë të arkës së shtetit.
Nga ana tjetër Edi Ramës, po i sharrojnë me shpejtësi edhe ‘degët’ më të forta ku është mbajtur këto 6 vite; klanet politiko-ekonomike-mafioze.
Goditja që i dha Departamenti i Shtetit Vangjush Dakos, ose siç njihet ndryshe ‘bankomati i Ramës’, nuk ishte thjeshtë një episod i veçantë, por nisja e çmontimit të korrupsionit të madh dhe krimit të organizuar në pushtet.
Në intervistën e tij të fundit për Zërin e Amerikës, Ndihmës Zëvendës Sekretari i Shtetit Palmer i hoqi edhe një ‘tullë-alibi’ të madhe këtij kryeministri në ditët e fundit të sundimit; Ai nuk ka më mbështetjen e SHBA-ve.
Pikërisht për këtë ‘tullë’, nga të fundit që i ka mbetur Ramës kryeministër, ka ‘folur’ në karikaturën politike të radhës botuar te Mapo.al, artisti i njohur Bujuar Kapexhiu.
