“Shqipëria është shndërruar në një koloni të Turqisë”. Kështu do ta shpjegonte pak ditë më parë opinionisti amerikan David Filips veprimin e qeverisë shqiptare dhe Bashkisë së Tiranës për të ngritur një memorial në nder të viktimave të grushtit të shtetit në Turqi. Një akuzë e cila qëndron po ti referohemi nënshtrimit që Shqipëria po bën ndaj kërkesave të presidentit turk Erdogan.
Sot shqiptarët brenda dhe jashtë kufijve po vuajnë tradhtitë kombëtare nga drejtuesit e qeverive si në Kosovë ashtu edhe në Shqipëri. Në Kosovë u tentua projekti i serbomadhisë, projekt fatkeq i cili u varros në samitin e Berlinit dhe ideuesit e tij Rama, Vuçiç dhe Thaçi u shfaqën hapur. Ndërsa në Shqipëri, shqiptarët u habitën kur befas një pllakate mermeri u vendos si memorial për disa të rënë që nuk kanë lidhje me Shqipërinë. Në të vërtetë kjo mbetet një qokë e kryeministrit Rama ndaj presidentit Erdogan, por pyetja del se ç’lidhje ka populli shqiptar se kush u vra në grushtin e shtetit, sipas palës turke? Ajo është çështje brendshme e Turqisë dhe nuk kishte pse Tirana zyrtare përzihej në glorifikimin e atyre që ranë për Erdogan.
Memoriali ka trazuar ndërgjegjen kombëtare, pasi nuk ka lidhje me Shqipërinë dhe duket një provokim i rrezikshëm sa kohë është Erdogan në pushtet, sepse vrulli online shqiptar për ta rrëzuar atë memorial mund të sjellë komplikacione të rrezikshme për vendet tona.
Ky është rasti i dytë kur Edi Rama shet shqiptarët, ndërsa me projektin e Serbomadhisë tentoi të shiste Kosovën Serbisë, me përqafimin e kërkesave të “vëllait” të tij Erdogan, Rama po shet Shqipërinë.