Ish kryeministri Sali Berisha ka qenë deputeti i parë i opozitës, që do të deklaronte hapur heqjen dorë nga mandati parlamentar.
Lidhur me këtë fakt, ai ka treguar në Syri TV, përballë gazetarit Çim Peka, arsyen e këtij vendimi.
Gjatë deklaratës së tij, ai nuk kurseu edhe kritikat ndaj një pjese të faktorit ndërkombëtar në vend, që sipas tij kanë ndikuar në shumë ngjarje në Shqipëri por edhe në Ballkan.
“E kam bërë kur u bë zgjedhja e Prokurorit të Përgjithshëm sepse pashë që u shkel çdo parim. Pashë që u shkel edhe nga ndërkombëtarët. Nuk mund të pranoj kurrë ndërhyrjen e tyre me pasoja shumë të rënda. Çdo gjë e mirë që arrihet në këtë vend, pa diskutim ka mbështetjen, ndihmën fisnike e bujare të ndërkombëtareve.
Suksesi dhe ndështimi në Shqipëri lidhet me drejtuesit shqiptarë. Por a kanë ndikuar ndërkombëtarët? Në mënyrë të padiskutueshme. Si në të gjithë Ballkanin. Nga masakra e Sarajevës deri te zgjedhja e Arta Markut, ka qenë dorë ose gabimi i ndërkombëtarëve”, u shpreh ish kryeministri Sali Berisha.
