Pas rekomandimit pozitiv për hapjen e negociatave me Shqipërinë, Komisioneri për Zgjerimin, Johanes Hahn dhe shefja e diplomacisë të BE-së, Federika Mogherini u pyetën nga gazetarët për problemet e krimit të organizuar, që paraqet Shqipëria.

Pyetja e gazetares së Financial Times ka qenë si për Mogherinin, ashtu edhe për Hahn:

“A mund t’ju pyes të dyve, si planifikoni t’i bindni Këshillin dhe shtetet anëtare, sidomos shtetet e mëdha anëtare si Franca dhe Gjermania që janë të shqetësuar sa i takon nivelit të krimit të organizuar dhe çështje të tjera të ristrukturimit të Shqipërisë dhe cila do të jetë strategjia juaj më tej?”

Mogherini nuk dha detaje të progres-raporteve, por tha se dokumentet janë hartuar në bazë të të dhënave konkrete për rekomandimet dhe për detyrimet e përmbushura, si nga Tirana, ashtu edhe nga Shkupi.

Referuar analizave të ndryshme, ndërkombëtarët kërkojnë zgjidhjen e çështjes “Tahiri”, si çelësi që do hapë portën e nisjes së reformës në drejtësi. Bërja “kurban” e Llallës, nuk do ti mjaftojë ndërkombëtarëve për ti hapur dritën jeshile Shqipërisë për në BE, edhe pse Mogherini i tha “po” fillimit të negociatave.