Ish-ministri i Drejtësisë, Ylli Manjani ka reaguar lidhur me situatën e tensionuar që është krijuar këtë mëngjes nga përplasjet mes policisë dhe banorëve të Unazës së Re.

Përmes një postimi në rrjetet sociale, Manjani i drejtohet policisë duke u shprehur se nuk është me asnjë polic që sot gjendet tek Unaza i rreshtuar kundër shqiptarëve që po mbrojnë shtëpitë e tyre, teksa shton se “detyra e policisë nuk është të prishë, por të mbrojë shtëpitë e njerëzve”.

Reagimi i plotë i Manjanit

Nuk kam asnjë mundësi mirëkuptimi për asnjë polic që sot gjendet tek unaza i rreshtuar kundër shqiptarëve që po mbrojnë shtëpitë e tyre.

Nuk funksionon më as me shkelje syri, e as me justifikimin e përhershëm: “buka e kalamajve”. Nuk mbahen kalamajt e tu duke dhunuar kalamajt e tjetrit!

Aq më tepër që detyra e policisë nuk është të prishë, por të mbrojë shtëpitë e njerëzve.

Kjo eshtë koha e burrave dhe jo e qaramanëve. Kërkohet rreshtim i qartë: o me popullin, o me banditët që qeverisin! Kush rri mbron banditët do duhet të largohet njësoj si ata. Pa asnjë mëdyshje!