Gazetarët shqiptarë, mediat shqiptare, organizatat e medias dhe ato të shoqërisë civile i bëjnë thirrje qeverisë të tërheqë menjëherë dhe pa negociata dy projektligjet e prezantuara si ‘Paketa Antishpifje’.

Në deklaratë theksohet se këto dy projektligje e kthejnë AMA-në në agjenci censure kurse AKEP-in në agjenci përmbarimore.

‘Ato i bëjnë thirrje Qeverisë që të tërheqë urgjentisht këto projektligje. Organizatat vërejnë se dy projektligjet, ai për transformimin e AMA-s në një agjenci censure, dhe të AKEP-it në një agjenci përmbarimore për vendimet censuruese të AMA-s, përbëjnë një akt të paprecedent në botën demokratike. Çështjet e etikës, të tilla si e drejta e përgjigjes ndaj një akuze, apo e drejta e dhënies së fjalës para publikimit të një akuze, në çdo vend demokratik trajtohen nga kodet e etikës dhe organet vetërregulluese të medias. Çështje të luftës hibride, dizinformimit, financimit me para të pista të medias apo partive politike nga politika apo krimi i organizuar janë të tilla që duhet të hetohen nga organet ligjzbatuese në përputhje me ligjet dhe garancitë që ofrohen nga ligjet ekzistuese, të tilla si kodi penal apo kodi i procedurës penale.’ – thuhet në deklaratën e Këshillit Shqiptar të Medias.

Më tej në deklaratë vërehet se në Shqipëri ka ligje që rregullojnë çështjet në rastet kur medias shkel të drejtat e personit e çdo ndërhyrje tjetër.

Sipas organizatave që janë kundër projektligjeve të qeverisë, përpjekja për të zëvendësuar gjykatat me organe në varësi të pushtetit politik, shkel të drejtat themelore të njeriut.

‘Shqipëria ka ligje që rregullojnë çështjet kur media shkel të drejtat e të tjerëve dhe çdo ndërhyrje tjetër, përfshirë krijimin e një organi administrativ është krejtësisht i panevojshëm në një shoqëri demokratike.

Çështjet e shpifjes dhe fyerjes në Republikën e Shqipërisë dhe në çdo vend ku sundon shteti i së drejtës duhet të shqyrtohen vetëm dhe vetëm në gjykata si pushtet i pavarur. Tentativa për të zëvendësuar gjykatat me organe drejtpërsëdrejti në varësi të pushtetit politik përbën bazë për shkelje të rënda të të drejtave themelore të njeriut dhe mund të transformohet në një gur themeli për një regjim diktatorial.’ – mbyllet deklarata.

Në ditët në vijim, pritet që gazetarët të zhvillojnë dy protesta ditën e mërkurë e të enjte, para seancës së 19 dhjetorit ku qeveria pritet të votojë në Kuvend dy projekligjet në fjalë.