Ambasadorja amerikane Yuri Kim e ka vënë fort theksin dje në rëndësinë e zbatimit të Reformës në Drejtësi nga qeveria shqiptare dhe i ka mëshuar faktit se SHBA-ja do të jetë në krah. Yuri Kim, në pritjen e organizuar nga Ministria e Drejtësisë më 31 janar, u rikujtoi qeveritarëve shqiptarë arsyen pse ata dhe atë vetë, i quajnë "shërbyes publikë". 

 “Për të gjithë ne sonte, qofshim amerikanë, gjermanë, shqiptarë, italianë, - tha znj. Kim, - pjesa më e madhe prej nesh, të gjithë ne në fakt, jemi qytetarë publikë, shërbyes publikë. Dhe jemi mbledhur këtu për të shënuar kauzën e nderuar “Drejtësi për të Gjithë” dhe po punojmë për të siguruar begatinë ekonomike dhe demokratike të Shqipërisë.

Ne mbartim një privilegj të madh dhe një detyrë edhe më të madhe për të siguruar besimin e publikut se do t’i bëjmë punët tona me integritet, me besnikëri ndaj shtetit ligjor dhe parimeve të paanësisë. Prandaj na quajnë shërbyes publikë…

Në çaste kritike, Shtetet e Bashkuara kanë qenë gjithnjë pranë miqve dhe aleatëve shqiptarë… Ky çast, ndërsa ju përpiqeni të zbatoni plotësisht reformën në drejtësi, është një prej tyre. Dhe ashtu siç e kam thënë më parë, për të gjitha çastet e kaluara, ashtu dua t’ju them sërish sonte, se në reformën në drejtësi, jemi me ju krah për krah”.