Komiteti i Ministrave të Këshillit të Europës ka rënë dakord këtë të mërkurë për krijimin e një liste me pika, që synon të sigurojë që fituesit e zgjedhjeve në kontinent të ruajnë praktikat demokratike. Lista e përpuluar nga Komisioni i Venecias dhe grupi i ekspertëve kushtetuese të Këshillit të Evropës është përcjellë si lajm edhe nga Presidenti Ilir Meta, i cili ka shkruar në rrjetin social se angazhimi i marrë nga BE duhet mbështetur nga të gjitha palët në Shqipëri.

“Një angazhim që duhet mbështetur nga të gjithë që të parandalohet degradimi i standardeve demokratike të qeverisjes dhe shtetit të së drejtës”,-shkruan Meta.

Lista në fjalë, pason një paralajmërim të bërë vite më parë nga ish-sekretari i përgjithshëm i Këshillit të Evropës Thorbjorn Jagland, i cili vinte në dukje se disa qeveri pasi fitonin zgjedhjet, përpiqeshin të çmontonin masat mbrojtëse demokratike, përfshirë këtu përpjekjet për të miratuar ligje pa debat politik apo deri tek shkarkimet e gjyqtarëve apo zyrtarëve të lartë për emërime politike.

Lista thekson se demokracia është më tepër se ‘fituesi i merr të gjitha’ dhe se shumica qeverisëse dhe opozita parlamentare kanë të dyja përgjegjësinë për të ruajtur praktikat efektive demokratike.