Në një lidhje të drejtpërdrejtë për “Vizion Plus”, kryetari i Partisë Demokratike, Lulzim Basha përsëriti thirrjen për qeverinë që të veprojë sa më parë dhe të mbyllë fasoneritë dhe call centers për të parandaluar përhapjen e mëtejshme të Koronavirusit. 

“Prej ditës së parë kemi kërkuar marrjen e masave sa më të shpejta dhe sa më të forta. Ndaj përshëndes çdo masë që shkon në forcimin e regjimit të distancimit social. Janë shumica prej tyre masa që i kemi kërkuar prej kohësh. Kjo pjesë e punëd duhet intensifikuar. Duhet të merren në kohë këto masa. Ajo që mungon është mbyllja e vatrave potenciale të infeksionit, si fasoneritë, call center, fabrikat. Gjej rastin të përsëris thirrjen time të përditshme sepse çdo vonesë në këtë drejtim do të na kushtojë jetë dhe shëndetin e njerëzve. Masat mbështetëse janë shumë mbrapa. Një pjesë e madhe e popullsisë nuk kanë mundësi të sigurojnë të përditshmen, ushqimin apo trajtimin minimal edhe për të moshuarit dhe për shtresat në nevojë", tha Basha.

Më tej, lideri i opozitës shtoi se, qeveria nuk po bën mjaftueshëm për të marrë masa për krizën ekonomike.

Sipas tij, vendi ynë ka shumë mundësi ekonomike për të ndihmuar shtresat në nevojë dhe të moshuarit.

“Qeveria është shumë vonë me marrjen e masave për të përballuar krizën ekonomike. Ne kemi më shumë se 2 javë që kemi propozuar paketën tonë. Disa propozime janë pranuar, por nuk po zbatohen. Akoma nuk e dimë nëse njerëzit që janë mbyllur në shtëpi do të kenë të garantur minimumin jetik. Shqipëria ka mundësinë të bëjë 3 herë më shumë se çfarë ka bërë deri tani”, deklaroi Lulzim Basha.

Deri tani, zyrtarisht, Shqipëria numëron 223 të infektuar me COVID-19 dhe 11 viktima.