“E pranoj, ditët e para pamë problemet në shtëpinë tonë”, presidentja e KE i kërkon falje Italisë. Ja premtimi për ndihmë

E Enjte, 02 Prill 2020 15:39

Presidentja e Komisionit Europian, Ursula von der Leyen, në një letër të hapur i ka kërkuar falje Italisë, për sjelljen e saj në ditët e para të krizës, në përballimin e pandemisë koronavirus.

Teksa bën thirrje për më shumë solidaritet në nivelin e BE për të luftuar emergjencën e koronavirusit, duke shtuar se ndryshimet midis kombeve po i vinin të gjithë në rrezik, von der Leyen thekson se Bashkimi Evropian do të ndajë deri në 100 miliardë euro për vendet më të goditura nga pandemia, duke filluar nga Italia, për të kompensuar uljen e pagave dhe ruajtjen e vendeve të punës.

Në një letër të botuar në të përditshmen italiane “La Repubblica”, von der Leyen tha që shumë shtet ishin përqëndruar në problemet e tyre në ditët e para të krizës, gjë e cila tha ajo “ishte e dëmshme dhe mund të ishte shmangur”.

“Vetëm solidariteti do të na lejojë të dalim nga kjo krizë,” shkruan von der Leyen në letër. “Distanca midis kombeve evropiane … i vë të gjithë në rrezik. Duhet pranuar që në ditët e para të krizës, përballë nevojës për një përgjigje të përbashkët evropiane, shumë kanë menduar vetëm për problemet e tyre të shtëpisë”.

Letra e Von der Leyen u hap me një ndjesë për Italinë e përfundoi me një listë të mënyrave të ndryshme që BE është tashmë duke ndihmuar Italinë të përballet me pasojat ekonomike të bllokimit të saj tre-javor nga kriza e koronavirusit, shkruan Euractiv.