“Zgjidhja është të ndërpresësh çdo lloj shpenzimi, çdo lloj angazhimi tjetër financiar dhe ta çosh të gjithën këtu, njësoj si një familje kur është në hall”, tha Luzim Basha gjatë një interviste për ora news.

“Çfarë bëjmë? Një familje kur është në hall, bie një shpenzim të madh për të bërë apo apo ka një borxh të madh për të larë. Cfarë bëjmë? Mblidhet edhe shikon çfarë mund të bëjmë, çfarë shpenzimi mund të ndërpresim, çfarë mund të shesim për ta përballur këtë hall. Kjo është ajo që kemi kërkuar për familjen e madhe, për shoqërinë, ku administratori ka për detyrë pikërisht të bëjë këtë: Të ndërpresë çdo lloj shpenzimi tjetër”, tha kreu demokrat.
Pjesë nga intervista:
Pyetje: Çfarë zgjidhje?

Lulzim Basha: 120 milionë euro kontrata koncensionare. Pse ngurohet? Po hyjmë në muajin e dytë të epidemisë. Pse ngurohet të anullohen këto 120 milionë kontrata koncensionare?

Pyetje: A mund të ndërpriten shërbimet ndaj qytetarëve zoti Basha?

Lulzim Basha: Për çfarë shërbimesh e keni fjalën? E keni fjaën për kontrata, afera të pastra. Një pjesë e tyre kanë të bëjnë më kontrata ndërtimi 3-fish, 4-fish çmimi. Një pjesë prej tyre ka të bëjë me para që hidhen për gjëra që nuk ekzistojnë. Incerneratori I Fierit nuk ekziston. Pra nuk bëhet fjalë, këto janë justifikime të kota.

Pyetje: Cilat shërbime të tjera duhet të ndërpriten?

Lulzim Basha: Të 12 kontratat koncensionare të 10 oligarkëve, 120 milionë euro për këtë vit Janë një rezervë e cila duhet të vendoset urgjentisht në funksion të epidemisë, në funksion të krizës, në funksion të jetës dhe shëndetit të qytetarëve. Plus 40 milionë euro shpenzime operative plus 100 milionë euro investime publike të planifikuara këtë vit përbëjnë 260 milionë euro. Por pyetja është fare e thjeshtë. Po Kosova ku e gjen mundësinë që të bëjë një paketë 3 herë më të madhe se Shqipëria kur ka një buxhet 2 herë më të vogël se Shqipëria? Pra buxheti i shtetit të Kosovës, i Republikës se Kosovës është 2 herë më i vogël se Shqipëria. Paketa e parë është 3 herë më e madhe se Shqipëria. Dhe çfarë bën me këtë paketë? Financon 50% të qerave, të atyre bizneseve që janë mbyllur. Ndërsa këtu hidhen hapa të cilat e heqin përgjegjësinë nga qeveria dhe e kalojnë në hapa që mund të çojnë në përplasje midis njerëzve.

Padiskutim që qeramarrësit janë në vështirësi, prandaj kemi propozuar që prej 3 javësh që ata të financohen, të subvencionohen, të kenë një pagë, një përfitim minimal, për qeranë, për dritat, për ujin. Por në vend që të ndodhë kjo, në vend që të zgjidhet qesja për qytetarët, vazhdon mbahet e mbyllur qesja e koncensioneve.

Pyetje: Ku do të gjenden këto para?

Lulzim Basha: Sapo ua thashë 120 milionë euro koncensione, 100 milionë euro të investimeve publike. 40 milionë euro shpenzime publike. Si fillim 260 milionë euro. Më falni, ku i gjeti Kosova paratë? Pra paratë janë, por duhet të ketë një vullnet për të ndihmuar qytetarët, për të ndihmuar… kjo është një betejë për jetën. Nuk pyetet për asgjë tjetër. Duhen marrë vendime të mëdha, duhen marrë vendime të shpejta.

Pyetje: A nuk mendoni se anullimi i koncensioneve do të sjellë një gropë në buxhetin e shtetit?

Lulzim Basha: Po si? Si e mendoni gropën? Gropën e kanë sjellë koncensionet. Janë koncensionet ato që e kanë gërmuar gropën, jo tani, kanë 2-3 vjet. Ajo që po them është fare e thjeshtë. Që kur jemi në një kohë lufte për jetën dhe shëndetin e qytetarëve, jo vetëm koncensionet, por çdo lloj shpenzimi tjetër duhet anulluar dhe duhet çuar në drejtim të këtyre 3 prioriteteve: shëndetit, jetës dhe mirëqënies së qytetarëve dhe pa bërë këtë ne do të vazhdojmë si Shqipëri të jemi disa hapa mbrapa Kosovës. Nuk po krahasohemi me vendet e tjera. Sot Kosova ka njoftuar se do të bëjë një paketë tjetër ndihme, ndërkohë paketa jonë e parë anemike e dobët, që në parim duhet të ndihmojë 1/3 e shqiptarëve akoma nuk ka filluar të japë efektet e saj.