Kreu i opozitës shqiptare, Lulzim Basha, kërkoi që herët mbylljen e fasonerive sepse mund të shërbejnë si vatra të rrezikshme të infeksionit. Paralajmërimi i tij u kthye në realitet pas shpërthimit të infeksionit nëpër fasoneri, që nga Shkodra e deri në Kurbin e Krujë.
Të dhënat janë shqetësuese. Por kreu i PD nuk kërkoi vetëm mbylljen e fasonerive, por edhe ndihmën e shtetit ndaj këtyre bizneseve.
Duke folur për ABC News këtë mëngjes, Basha tha se shteti që lejoi shpërthimet e virusit, tashmë jo vetëm nuk po i ndihmon, por po i gjobit fasoneritë.
“Duhet të shmangen vatrat e infeksionit në fasoneri dhe duhet të mbështeten nga qeveria. Jam njoftuar sërish nga punonjës fasonerie që janë të shqetësuar për situatën. Por kërkesat tona kanë rënë në vesh të shurdhër. Në vend që qeveria të kujdeset edhe për Krujën, pasi shihet si “këmbanë alarmi”, ata vetëm kanë nisur gjobitjen e fasonerive dhe shteti nuk mban asnjë përgjegjësi,” tha Basha
Kreu i opozitës paralajmëroi se ky dështim me krizën e koronavirusit do i shtohet dështimeve të tjera të Edi Ramës. Basha tha se kjo qeveri do të shënojë një katastrofë elektorale në zgjedhje.