Është ashpërsuar protesta e maturantëve përpara Ministrisë së Arsimit. Me thirrjen “Besa, na preve në besë”,”Dëgjoni zërin tonë”, ata kanë përpiluar një listë kërkesash për ministren e Arsimit ku i kërkojnë të rivlerësohet provimi shtetëror i Gjuhës Shqipe dhe Letërsisë që ata dhanë dje.

“Ai nuk ishte provim, ishte tallje me ne”, thanë gjimnazistët e irrituar, pasi sipas tyre, teza e provimit nuk kishte lidhje me programin e tyre mësimor , nuk kishte lidhje me atë që u ishte thënë të mësonin dhe nuk ishte mbajtur premtimi që nuk do të kishte pyetje nga leksionet e dhena online në muajt e karantinës.

Maturantët janë tallur me një pyetje që u ishte dhënë në provim se nuk po po testoheshin për 12 vjet studim të Gjuhës Shqipe dhe Letërsisë, por për “Turin”, një personazh që u ishte sjellë ndër pyetjet.

Por, ata nuk do të heqin dorë nga kërkesat, sepse notat e provimeve shtetërore iu ulin mesataren dhe do të ndikojnë në përzgjedhjen e degës së studimeve në universitete.

Deri tani, nga Ministria e Arsimit nuk ka pasur asnjë reagim ndaj protestës dhe madje nuk janë publikuar as përgjigjet e testit aq të debatueshëm të Gjuhës Shqipe dhe Letërisë.