Kryeministri i Kosovës Avdulla Hoti ka vendosur të mos shkojë në 27 qershor në Shtëpinë e Bardhë, në samitin për Dialogun Kosovë - Serbi.

Vetë Hoti e ka shpjeguar në Fb arsyen:

"Për shkak të zhvillimeve të reja në Prishtinë si rezultat i akuzave të dorëzuara nga Zyra e Prokurorit të Specializuar, më duhet të kthehem në Prishtinë për t'u marrë me situatën.
E kam njoftuar Ambasadorin Grenell se nuk mund të marrë pjesë në takimin e datës 27 qershor në Shtëpinë e Bardhë."

Ky vendim nga ana e Hotit është marrë pasi disa orë më parë edhe u deklarua për aktakuzat e ngritura nga Haga ndaj Presidentit Hashim Thaçi dhe kreut të PDK-së, Kadri Veselit. Në atë reagim, Hoti u shpreh:

"Qeveria e Republikës së Kosovës, sIme të gjithë qytetarët e Kosovës, është njoftuar sot nëpërmjet një deklarate për shtyp, se Zyra e Prokurorit Special ka deponuar pranë Dhomave të Specializuara të Gjykatës Speciale një aktakuzë ndaj Presidentit të Republikës së Kosovës, z. Hashim Thaçi dhe Kryetarit të Partisë Demokratike të Kosovës, z. Kadri Veseli.

Qeveria e Republikës së Kosovës konsideron se askush nuk mund cilësohet fajtor pa vendim përfundimtar të gjykatës.

Qeveria e Republikës së Kosovës fton të gjithë qytetarët të tregojnë qetësi.

Qeveria beson se lufta e popullit të Kosovës dhe Ushtrisë Çlirimtare të Kosovës ishte e drejtë dhe çlirimtare dhe, si e tillë, do të mbetet si një nga periudhat më të rëndësishme të historisë së vendit."