Lëvizja Socialiste për Integrim po zhvillon zgjedhjet për kreun e partisë dhe delegatët e Konventës Kombëtare. Pjesëmarrja në gjithë vendin është e jashtëzakonshme. Në të 12 qarqet, janë me mijëra qytetarë që u janë drejtuar kutive të votimit. Ndërkohë, për herë të parë për një parti politike në vend, LSI po zhvillon votimin online. Anëtarë të kësaj force politike në vendet e BE, SHBA dhe gjithë botën, kanë marrë pjesë në votimin elektronik.

Në Vlorë, Zëvendëskryetari i LSI-së, Luan Rama u shpreh se pjesëmarrja në këto zgjedhje tregon dhe fitoren që po vjen më 25 prill. Luan Rama tha se LSI është forca vendimtare që do të rrëzojë regjimin e partisë që sot është në pushtet.

“Është në ADN-në e LSI-së të qenit ofensiv, të qenit të vendosur dhe fushatat përgjithësisht e stimulojnë më shumë këtë qasje, këtë trend të veprimit elektoral të LSI-së, aq më tepër që në këtë situatë politike në të cilën gjendet vendi, situata ekonomike dhe kemi parasysh tërë kompleksitetin e faktorëve që lidhen me kostot e mëdha të qeverisjes, LSI-ja në Vlorë po përpiqet dhe do t’ia arrijë të bëjë të mundur, që jo vetëm të rrisë rezultatin e vet elektoral, por do të jetë dhe jam i bindur për këtë gjë, do të jetë forca vendimtare e regjimit të një regjimi apo kaste që e ktheu qeverisjen në qeverisje korruptive. Vlora ka qenë dhe mbetet misionarja më e rëndësishme e historisë sonë kombëtare dhe misionare e rëndësishme e dimensioneve qytetare të angazhimit, në të mirë të vendit. Sot janë zgjedhjet në të gjithë Shqipërinë për Kryetarin e LSI-së në rang kombëtar dhe në nivel lokal çdo strukturë e LSI-së zgjedh delegatët e vet, në rastin konkret këtu zgjidhen delegatët e LSI-së, që do të përfaqësojnë Vlorën në Konventën Kombëtare të LSI-së. Pastaj në datën 5 dhjetor ku do të mbahet Konventa Kombëtare, do të zgjidhen forumet e tjera drejtuese të partisë”,-deklaroi Luan Rama.