Nga Elona Caslli

Pse nuk i bie Opozitës?!

Duke qenë se jam vënë shumë herë përballë kësaj pyetjeje nga individë brenda dhe veçanërisht nga individë që jetojnë jashtë vendit, po ju përgjigjem.

Opozitës nuk i bie veç për një arsye;
Është i vetmi mekanizëm ekzistues për largimin e Edi Ramës dhe ky përfundim nuk bazohet në opinion personal, por mbi shifra konkrete sondazhesh.

E braktisim për një çast Opozitën e Bashkuar dhe t’i japim zë pyetjes në krye të artikullit.

E zëmë se filloj të sulmoj Opozitën e Bashkuar çdo ditë. Kujt i shërben ky sulm?!

Unë besoj se ky sulm ushqen veçse mandatin e tretë të Edi Ramës. Pse e ushqen?!

Sepse unë kam shpallur haptazi ofertën publike, ku kërkoj që të më jepni një zgjidhje konkrete përtej Opozitës, që heq Rilindjen nga pushteti dhe do të jem e para që i jap zë.

Nuk mora asnjë përgjigje veç disa hartimeve të stërgjatura. Hartime di të bëj dhe unë dhe të them; O dua një Opozitë të kulluar dhe të përsosur, ose nuk dua asgjë.
Ekstremet janë utopi dhe nuk janë të as të zbatueshme dhe as të dobishme por veç fort të dëmshme.

Ylli Manjani ka dhënë një përcaktim krejt të qartë për këtë situatë- Nuk mbështetet Opozita, por mbështetet Demokracia.

Kjo do të thotë se krijimi i përvojës së një mandati të tretë për Rilindjen që ka qenë një dështim total në qeverisje dhe ka dëbuar 470.000 shqiptarë nga ky vend, është vrastar për këtë komb.

Kur identifikohet një problem, duhet thënë edhe zgjidhja. Kur unë kërkoj një zgjidhje përtej Opozitës, nuk marr përgjigje, pasi përgjigje nuk ka.

Nuk mund të vijnë përgjigjet nga parti që krijohen pesë muaj para zgjidhjeve dhe në sondazhe klasifikokohen ” e të tjerë” sikundër nuk mund të jetë përgjigje pretendimi- O opozitë e përsosur ose asgjë! Le ta mbajë Rama!

Përsosmërinë nuk e kërkoj nga Opozita dhe nuk e pres as në qeverisjen e saj, në rast se merr pushtetin. Nga Opozita pritet kalimi nga normaliteti kriminal në normalitet problematik.

Rotacioni nuk sjell mrekullinë, por shmang vrasjen përfundimtare të demokracisë në vend.

Ndaj, jam më e prirur të bëj kompromis me një mekanizëm të papërsosur si Opozita, se të pres përsosmërinë e Opozitës dhe të ushqej mandatin e tretë të Edi Ramës.

Post Scriptum- Përqëndrimin e pushtetit në duart e një njeriu të vetëm ky popull e provoi për gjysmë shekulli. Në e ka marrë malli, le ta provojë përsëri