Shqetësimi për shqiptarët që kërkojnë azil në Belgjikë i është shprehur sot organeve shqiptare nga sekretari belg i shtetit për Azilin dhe Migracionin Teo Fransken. Ai takoi në Tiranë drejtuesit e Ministrisë së Brendshme dhe Policisë së Kufirit.

 Zyrtari belg foli edhe për përdorimin force nëse shqiptarët nuk do të respektojnë rregullat e lëvizjes në zonën Shengen

Në vitet e fundit, Bashkimi Evropian, veçanërisht Shtetet Anëtare si Belgjika, kanë patur një numër të konsiderueshëm të kërkesave për azil nga shqiptarët, më shumë se çdo shtetas tjetër evropian.

Në Francë, shqiptarët ishin kontigjenti më i madh i azilkërkuesve në vitin 2017, më shumë se afganët, sudanezët, sirianët apo shtetasit e ndonjë vendi tjetër që është në krizë.

Europa, duke përfshirë Belgjikën, e cilëson Shqipërinë si një “vend të sigurtë”.  Kjo, megjithatë, nuk i ndalon autoritetet të shqyrtojnë kërkesat individuale për azil nga ai vend, në përputhje me Konventën e Gjenevës, e cila mbron viktimat e mundshme të persekutimit, për arsye racore, fesë, grupit social apo të opinionit politik, nga çdo vend. Aplikimet nga qytetarët e vendeve të sigurta trajtohen sipas një procedure të shpejtë, por për shqiptarët shkalla e miratimit është veçanërisht e ulët. Në Belgjikë është 5%.