Gati 3 milionë metër katrorë leje ndërtimi për 1,028 ndërtesa të reja janë dhënë nga Bashkia Tiranë, sipas INSTAT në harkun kohor 2017-2019. Ndërkohë sipas një raporti të Nismës Globale kundër Krimit të Organizuar Ndërkufitar, rreth 60 për qind e firmave të ndërtimit që kanë marrë leje në këtë periudhë kohore në kryeqytet nuk justifikojnë burimet e tyre financiare, ndërsa vlerësohet se për 3 vitet u pastruan në ndërtim rreth 1.6 miliardë euro. Sipas bilanceve të tyre, kompanitë kishin të ardhura minimale dhe nuk kishin as asete dhe hua dhe as kompani të lidhura, që do tu mundësonin të bënin një investim të tillë. Raporti i Nismës Globale kundër Krimit të Organizuar Ndërkufitar, thekson se për 3 vitet, 2017-2019 janë pastruar në ndërtim rreth 1.6 miliardë euro.

Por pavarësisht nga ky alarm ndërkombëtar, Erion Veliaj nuk di të ndalet. Mbi 15,6 miliardë lekë (rreth 127 milionë euro) është vlera e ndërtimeve të miratuara në Tiranë, vetëm gjatë 3 mujorit të parë të vitit 2021 sipas shifrave të INSTAT-it I cili është bazuar në lejet e ndërtimit të dhëna.

 
Për gjithë vendin, vlera e përafërt e lejeve të ndërtimit miratuar pë tremujorin e parë 2021 për ndërtesa dhe punime inxhinierike është 26,6 miliardë lekë, ose rreth 216 milionë Euro. Krahasur me tremujorin e parë 2020, vlera e ndërtimeve është thuajse dyfishuar—nga 13,4 miliardë.

Tirana është qyteti me numrin më të lartë të lejeve të ndërtimit përm këtë periudhë, 72 leje nga 251 të miratuara në të gjithë vendin. Pas Tiranës rendoitet Durrës me 44 leje ndërtimi dhe Fieri me 26 leje ndërtimit. Pjesën më të madhe të lejeve të ndërtimit e zënë ato për banesa.

Në gjithë vendin numri i lejeve të ndërtimit është rritur me rreth 36 %, në krahasim me të njëjtën periudhë të vitit 2020. Kurse nga ana tjetër “çuditërisht”, çmimet e apartamenteve sa vijnë dhe rriten!