Shefi i Organizimit në PD, Klevis Balliu, komentoi në emisionin 'Syri Digjital' me moderatorin Bled Marku zgjedhjen e kreut të ri të SPAK, Altin Dumani. Klevis Balliu tha se drejtësia e mirë është drejtësia e pavarur ndërsa shtoi se SPAK vetëm për pavarësi nuk flet. Sakaq, Balliu theksoi se Reforma në Drejtësi ka deformuar sistemin e drejtësisë duke sjellë abuzime me aferat korruptive.
"SPAK vetëm për pavarësi nuk flet, kjo ajo çfarë kuptuam nga ky proces. Sot, ajo çfarë mendoj se ka rëndësi është që të kuptojmë që gjithë Reforma në Drejtësi ka shkaktuar deformim të sistemit të drejtësisë çka ka sjellë abuzimin me aferat korruptive."-tha Balliu.
Sipas tij, nuk kemi të arrestuar për koncesionet e Ilir Beqajt, nuk kemi të arrestuar as Engjëll Agaçin dhe as Edi Ramën pasi tentakulat e qeverisë janë brenda SPAK, që sot dolën në pah më shumë se kurrë.
“Institucion totalisht i varuar që nuk ka fuqi drejtuese, nuk është i pavarur. Institucion në fuqinë dhe pushtetin e njerëzve që e ushtrojnë atë pushtet këtu, të elementëve, faktorëve politikë kombëtarë e ndërkombëtarë. Nuk mendoj se kjo është gjë e mirë. Rezultati sot është zero.”-tha Balliu.
