Kryetari demokrat, Sali Berisha, e akuzoi ambasadoren amerikane në Tiranë, Yuri Kim, jo vetëm për qëndrimet e saj antiopozitare, por edhe sepse ka falsifikuar historinë e marrëdhënieve shqiptaro-amerikane.

“Ky ishte një vit i ngarkuar. Po kështu ky ishte viti i 100-vjetorit të marrëdhënieve diplomatike shqiptaro-amerikane. Nuk kishte kremtim më të padenjë se ai që organizoi guvernatorja Kim për 100-vjetorin.

Ajo për një vit me radhë mbajti flamurin e 'cancel culture'. Falsifikoi në mënyrën më të paskrupullt 100-vjetorin e marrëdhënieve të shqiptarëve me vendin që ata adhurojnë më shumë. Arriti deri aty sa barazoi veten me Lindita Nikollën në vështrimin e saj të historisë.

Nxorën figura të inkriminuara këmbë e krye si Taulant Balla si kremtues. U përpoq të manipulonte me çdo mënyrë vizitat e ish-personaliteteve, por që dështoi.

Së fundmi, porositi një dokumentar të tipit socialist, të realizimit socialist, ku marrëdhëniet mes dy vendeve ndërpriteshin në vitin 1991. E kuptoni vetë.

Ata që bëjnë betejë me historinë, e kanë një vend në histori,” tha Berisha, duke theksuar se manipulatorët dhe falsifikatorët e kanë vendin e tyre në histori.