Në maj të vitit 2021, miliarderi ultramajtist, George Soros, financoi me 1 milionë dollarë fushatën për zgjedhjen e prokurorit të Manhatanit, Alvin Bragg.
Ky është prokurori që thuhet se mund të ngrejë padi ndaj ish-presidentit amerikan, Donald Trump, duke e akuzuar se ka paguar një pornostare për të mos folur kundër tij.Çështja e financimit të këtij prokurori nga Soros është kthyer në qendër të vëmendjes në SHBA. Edhe guvernatori republikan, Ron DeSantis deklaroi se Bragg është një njeri i Sorosit, prandaj një padi e mundshme ndaj Trump është e motivuar politikisht.
Por Fox News ka zbuluar se Soros nuk ka qenë personi i vetëm në familje që ka sponsorizuar prokurorin Bragg.
Edhe djali i Soros, Jonathan dhe e shoqja e tij, Jennifer Allan Soros, kanë dhuruar direkt për fushatën e Bragg.
Të dhënat tregojnë se më 26 prill 2021, Jonathan Soros dha 10 mijë dollarë për fushatën e prokurorit. Tre ditë më vonë, e shoqja e tij dhuroi po 10 mijë dollarë.
Çifti në fjalë është një nga donatorët më të mëdhenj të Bragg.
Një zëdhënës i Soros nuk iu përgjigj kërkesës së Fox News për një koment në lidhje me këtë çështje.
Në vitin 2019, prokurorët e Nju Jorkut zgjodhën të mos ngrenë padi ndaj Trump. Por çështja është rikthyer sërish në prag të vitit elektoral në SHBA.
