Nga Elira Kadriu

 Flori Palushi dhe Besmir Muslia, organizuan sot një protestë simbolike, për të kujtuar edhe një herë plagën e emigrimit masiv që ka prekur qytetin e Kukësit, në Ditën e Rinisë. 

‘E vërteta është që nuk ka më të rinj dhe qyteti po boshatiset dita – ditës’- tha për Citizens Channel Flori Palushi.

Ai tregon se emigrimi ka prekur të moshuarit që mbesin vetëm, bizneset që nuk gjejnë punëtorë e klientë, si edhe banorët në fshatra të izoluar, ku ka mungesë të shërbimeve në shëndetësi dhe arsim.

‘Jam kthyer tani për festat, si të gjithë kuksianët, pasi këtu është e pamundur që të krijosh një jetë’- tregon Palushi.

Flori ka punuar në shumë vende të Evropës si Belgjikë, Greqi  por pas Vitit të Ri do të rikthehet për të punuar në Podgoricë.

‘Kosto e jetesës atje është më e ulët se këtu në raport me pagën, p.sh. atje një punëtor merr rreth 50 euro dita, këtu do merrte 15 mijë lekë’- tha Flori Palushi.

Ndërsa Besmir Muslia, mësues biologjie në shkollën ‘Hamdi Pelivani’ thotë se nga Kukësi po largohen të gjithë. Ai thekson se pasoja më e dukshme e emigrimit është boshatisja e shkollave nga nxënësit.

‘Nga faktorët që ndikon në këtë largim të të rinjve është edhe politika që ndiqet sidomos në këto punësimet shtetërore, i kanë kthyer në punësime familjare këtej dhe nuk i japin mundësi fare shtresave të ndryshme që të kenë mundësi të punësohen, edhe pse shkollohen’- shpjegon  Mulia.

Gëzim Hilaj është një tjetër i ri nga Kukësi i cili ka reaguar gjithashtu sot, në ditën e rinisë me pankartën : ‘Edhe sa ditë rinie n’dhe t’huj’.

Emigrimi boshatis bankat e shkollave në Kukës

Të dhënat e fundit zyrtare mbi numrin e banorëve në bashkinë Kukës janë ato të censit të vitit 2011. Më shumë se një dekadë më parë, Kukësi kishte 47.985 banorë, shifër e cila sot është tkurrur si pasojë e emigrimit masiv të të rinjve.

Raportet e siguruara nga Citizens Channel, tregojnë se në katër vitet e fundit në Kukës janë mbyllur gjashtë shkolla 9-vjeçare. Emigrimi masiv e ka tkurrur sistemin arsimor me 17% në vetëm pesë vite.

Shifrat po ashtu tregojnë se numri i nxënësve bie drastikisht pas mbarimit të shkollës 9-vjeçare. Prej viteve 2019-2023, në total në shkollat 9-vjeçare kanë ndjekur studimet 22.027 nxënës, ndërsa shifrat e nxënësve në total për ato vite në arsimin e mesëm bie në 7.340 nxënës.

Marrë me shkurtime nga Citizen Channel