Në një reagim për Syri TV, Ambasada e SHBA në Tiranë, ka hedhur poshtë gënjeshtrën publike të Lulzim Bashës, duke sqaruar e takimet me deputetët janë angazhim i përditshmërisë së tyre, ndërsa thekesojnë se për reformën duhen zbatuar rekomandimet e OSBE-ODIHR, që në raportin e saj kërkon reformë konsensuale dhe gjithëpërfshirëse 

“Si pjesë e angazhimit tonë normal diplomatik me anëtarë të parlamentit, Ambasada e SHBA takohet rregullisht me kryetarë, bashkëkryetarë dhe anëtarë të komisioneve të ndryshme parlamentare, përfshi Komisionin për Reformën Zgjedhore. Takimet nuk janë pjesë e ndonjë ndërmjetësimi. Interesi ynë mbetet për qeverisje të efektshme dhe përfaqësuese për të zbatuar rekomandimet e ODIHR-it dhe mirëpresim idetë e të gjitha partive të përgjegjshme për këtë qëllim,” thuhet në reagimin e SHBA.

Në të njëjtën linjë ka qenë edhe kreu i delegacionit të Bashkimit Europian në Tiranë, që i cilësoi thashetheme deklaratat e Lulzim Bashës, se SHBA e BE po negocion dhe mbështet reformën e njëanshme. 

“Unë e di që ka pasur thashetheme që qarkullojnë për përpjekjet e ndërmjetësimit etj… Më lini të them vetëm një gjë, për ne është tepër e rëndësishme që Shqipëria të ndjekë rekomandimet e misionit të OSBE- ODIHR,” tha ambasadori i BE, Silvio Gonzato.

Reagimet e forta të partnerëve ndërkombëtarë, vijnë pas deklaratës së kryeministrit Edi Rama se do të bëjë Reformë Zgjedhore të njëanshme dhe Lulzim Bashës që po përdoret nga mazhoranca për të siguruar forcën e kartonit për një reformë në favor të Partisë Socialiste.