Skandali më i fundit është ai i ‘5D’, kompanisë së drejtorëve të Bashkisë së Tiranës, që njëherazi ishin anëtarët e shtabit elektoral, që ditë e natë shantazhonin votuesit, blinin vota, premtonin, bënin presion, merrnin paratë nga buxheti, që më pas i përdornin me një skemë të sofistikuar, si fillim për të mbajtur në detyrë Erion Veliajn dhe më pas për të shumëfishuar fitimet, jo me përqindjet e zakonshme të korrupsionit, por 100% të fondeve.

Dhe këtë gjë e bënin duke pasur në krye të punëve të Bashkisë, Erjon Veliajn, atë që shfaqet sa herë ka festa, fetare ose jo, me atë fytyrën e ‘ëngjëllit’, njeriut të përvuajtur, që kujdeset për shtresat në nevojë, për të pamundurit, për pensionistët e plot kategori të tjera.

Atyre që sot i serviri një pjatë supë, janë ata që Veliaj, përmes drejtorëve të tij, atyre që janë në qeli, por edhe të tjerëve që i mban me gajret, derisa SPAK të finalizojë hetimet, mund të mos i vidhte ato paratë nga buxheti, që atë përkujdesjen për shoë, sikundër ndodh në raste festash, ta kishin çdo ditë.

Videon duke servirur pjatat me supë, si njeriu i përkushtuar, e ka shpërndarë në rrjetet sociale vetë kryebashkiaku, i cili ende, minimalisht nuk ka kërkuar një ndjesë që drejtorët e emëruar prej tij në krye të punëve të Bashkisë, u kapën nga SPAK si grabitës fondesh.

Do të kishte shumë më tepër sens, që para se të shfaqej si kryebashkiaku i dhimbshur, Veliaj të sqaronte ato këshilltarët në këshillin bashkiak, se çfarë kishte ndodhur, se si kishin avulluar 30 mln euro të taksave të qytetarëve nga buxheti te xhepat e të besuarve të tij.

Në fakt Erjoni ka bërë sot atë që di të bëjë më mirë, të vijojë shoë e propagandën, të sillet si kryebashkiak fasadë, edhe pse është kapur me presh në dorë në dy aferat më të mëdha, atë të inceneratorit fantazëm që nuk ekziston në Sharrë, dhe me ‘5D’ e drejtorëve, që në emër të tij, mblidhnin vota me hir e pahir që kllouni të vijonte mbajtjen e zyrës në Bashki dhe ata të fitonin statusin e investitorëve strategjikë.