Në 11 janar 2011 një televizion pranë Partisë Socialiste opozitare shfaqi një video ku dy anëtarë të qeverisë dukej se po diskutonin një aferë korruptive. Dhjetë ditë më vonë shefi i PS duke mobilizuar militancën në të tërë vendin thirri një “demonstratë” me skuadrone të dhunshme (ju kujtohen “kokëpalarët e Tomës”) që sulmuan policinë a gardën me pasoja tragjike për katër vetë. Ndër dy anëtarët e qeverisë në fjalë njeri ishte shkarkuar prej një viti e tjetri dha dorëheqjen fill pas publikimit të videos. Ky fakt nuk e ndali opozitën të demonstronte dhunshëm edhe pse kërkesa fillestare (dorëheqja) ishte e përmbushur.
Sot shoqëria civile dhe opozita thirri të dytin tubim proteste para bashkisë Tiranë ku oratorët kërkuan dorëheqjen e kryebashkiakut Veliaj (max) dhe mbledhjen e Këshillit Bashkiak sipas mocionit të këshilltarëve PD/LSI (min); policia shtyu protestuesit dhe këta hodhën shashka e flakadanë tek muret e bashkisë.
Ndryshe nga janari 2011, sot kemi një vendim gjykate të detajuar ku natyra e korrupsionit dhe abuzimit tejkalon jo vetëm precedentët por edhe imagjinatën.
Ndryshe nga janari 2011 sot kryebashkiaku, bazuar në cfarë lexojmë në vendimin e gjykatës e cfarë dimë nga ai para e mbas arrestimit të drejtorëve bashkiakë, është krejt i ekspozuar jo vetëm moralisht e politikisht por edhe penalisht.
Ndryshe nga janari 2011 sot gjykata kërkon hetimin e kryebashkiakut Veliaj, të cilin prokurori i posaçëm, me një “miopi” që po kthehet në model, e kishte lënë jashtë hetimit
Edhe për ndonjë tutkun që ende beson se korrupsioni i v2011 është më problematik se ai i v2024 është e qartë se sot jo vetëm natyra e korrupsionit por sidomos arroganca e të korruptuarve është përtej precedentit dhe imagjinatës.
Prandaj edhe reagimi publik nuk ka pse të jetë mesatar. Bashkia Tiranë nuk është një ndër shumë syresh por qendra e dytë e pushtetit në vend siç e fomuloi saktë zv-kryeministri në arrati.
Edhe opozita nuk mund të mjaftohet më me thirrje për tubim të lëshuara përnatë para mikrofonit e pastaj në grupe whatsappi.
Një mobilizim i madh në Tiranë e përtej do të duhet për këtë skandal të madh. Pa “kokëpalarë” të dhunshëm por me vullnet e vendosmëri!
Genc Pollo
Ish ministër e deputet
11 prill 2024
