Në një postim në rrjetet sociale, Meta tha se Rilindja i ka shpallur luftë familjes dhe po bën çdo përpjekje për shkatërrimin dhe zhbërjen e vlerave të saj, referuar edhe projektligjit për Shëndetin Riprodhues, ku parashikohet edhe surrogacia. 

Meta shtoi se duhen politika më konkrete sociale dhe ekonomike për ruajtjen e familjes.

REAGIMI I PLOTË I METËS:

Dita Ndërkombëtare e Familjes e gjen familjen shqiptare më të rrezikuar se kurrë nga sekti i “Rilindjes” që i ka shpallur luftë dhe po bën çdo përpjekje për shkatërrimin dhe zhbërjen e vlerave të saj.

Ky është sulm kundër identitetit kombëtar sepse ky është thelbi i agjendës së qëllimshme të “Rilindjes” për shpopullimin e Shqipërisë.

Është kjo rrymë çnjerëzore që synon të denatyrojë dhe asgjësojë familjen shqiptare me “Prindi 1 dhe Prindi 2” duke tentuar në mënyrë kriminale dhe antikombëtare për të shndërruar vendin në një fermë laboratorike të internacionales së surrogacisë.

“Rilindja” sot ngjason me një re të rrezikshme karkalecash që u është turur me oreks të papërmbajtur të korrave dhe bereqetit për t’i shfarosur.

Kështu është sjellë “Rilindja” për 11 vite me shqiptarët, familjet e tyre dhe me pasuritë publike e natyrore të Shqipërisë.

Ky është vendi shqiponjave dhe ne kurrë nuk do të lejojmë të kthehet në tokën e insekteve pa identitet.

Për ne Familja ka qenë e shenjtë dhe do të mbetet e shenjtë!

E mbështes fuqimisht forcimin e rolit dhe vlerave të Familjes, si dhe do të vijoj të promovoj mbajtjen e shëndoshë të saj.

CEO-t shqiptarë, optimistë për ekonominë këtë vit, por pasiguri të lartë për dekadën në vijim

Shqipëria ka nevojë për më shumë familje të reja dhe të qëndrueshme, për më shumë fëmijë dhe kushte më të mira për mirërritjen dhe edukimin e tyre, për politika më konkrete sociale dhe ekonomike.

Pesë prioritetet e Partisë së Lirisë për 4 milion shqiptarë plus janë “ilaçi” që ndalin shpopullimin, mbrojnë Familjen dhe Kombin!