Përtej propagandës së Erion Veliajt, Tirana çdo ditë dhe më shumë zhytet në një kaos të vërtetë për shkak të ndërtimeve pa kriter të kullave dhe infrastrukturës të shkatërruar pothuajse në çdo lagje të kryeqytetit.

Të shumta janë rrugët që çahen nga ndërmarja e ujsjellës-kanalizimi dhe më pas qytetarët dhe banorët kalojnë një kalvar vuajtjesh ku përdit duhet të ecin në baltë, ujë dhe rrugë të shkatërruar.

Duket se edhe në ditë të nxehta vere, rrugët në Tiranë e kanë të pamundur mos mbyten. Kështu ka ndodhur sot, në një zonë të Astirit në kryeqytet, ku uji nga pusetat ka shpërthyer, duke përmbytur rrugët.

Rruga është mbuluar nga ujërat e zeza duke e bërë të pamundur për qytetarët të kalojnë, e po ashtu, duke krijuar vështirësi dhe për makinat.

Qytetarët ndihen të braktisur nga Bashkia e Tiranës, pamjet më poshtë tregojnë se si është katandisur zona e Astirit:

• Qytetarët protestojnë, kërkojnë dorëheqjen e Veliajt

Kujtojmë që prej disa ditësh shoqëria civile së bashku me opozitë protestuan përballë Bashkisë së Tiranës ku kërkuan dorëheqjen e kryebashkiakut Erion Veliaj pas aferës “5D”, ku disa prej drejtorëve të kësaj Bashkie kishin përfituar miliona euro tendera nga kjo bashki apo institucione vartëse të saj me kompaninë e tyre “5D Konstruksion”, që sipas SPAK, pronarët “de facto” të saj ishin Mariglen Qato dhe Redi Molla.

Veliaj është i detyruar të japë “llogari” dhe të sqarojë këshilltarët në këshillin bashkiak, se çfarë kishte ndodhur, se si kishin avulluar 30 milionë euro të taksave të qytetarëve nga buxheti te xhepat e të drejtorëve të emëruar prej tij.