Në fjalën e tij para grupit parlamentar të Partisë Demokratike, Sali Berisha trajtoi gjithashtu temën e luksit dhe shpenzimeve të zyrtarëve të lartë në Shqipëri. Ai e ilustroi argumentin e tij duke përmendur një rast nga Koreja e Jugut, ku një çantë Christian Dior e Zonjës së Parë kishte shkaktuar zemërim të madh publik.

Berisha vuri theksin te çantat e shtrenjta të ministreve dhe zyrtarëve shqiptarë, duke treguar se ato janë shumë më të kushtueshme. Ai i ftoi gazetarët të dokumentojnë me foto luksin e dukshëm të klasës politike, duke e konsideruar këtë një çështje me rëndësi publike. Përmes këtij diskutimi, ai kritikoi mënyrën si përdoren fondet publike dhe standardet e qeverisjes. 

FJALA E BERISHËS:

Dhe së fundmi, një vend partner, një vend demokratik, një vend me një shkallë zhvillimi nga më të lartat, të jemi realistë, Koreja e Jugut, të mos harrojnë qytetarët shqiptarë se desh mori flakë për një çantë.
Për një çantë Christian Dior të Zonjës së Parë.
Të cilën, për hir të së vërtetës e kishin denoncuar disa kohë më parë.
Nuk jam në gjendje t’u them hollësira se mund të ketë edhe faktorë të tjerë, por presidenti tërhoqi ligjin e luftës që e shpalli pas 50 vitesh.
Dhe këta që u zemëruan, ishte fjala për çantë, një çantë Christian Dior, por e vërteta është që çantat Christian Dior nuk janë më të kushtueshme.
U them shqiptarëve unë, se çantat që hyjnë dhe dalin në parlament nga qeveritaret, Hermes, Birkin, Bottega Venetto, Louis Vuitton, vetëm shihni...
I ftoj mediat t’ua fotografojnë çantat ministreve... se ato nuk duken.
Ato kushtojnë, u jap fjalën ju, nga 200 gjer në 500 mijë euro.
Që i thotë Ulsiu banditit, e dua edhe një çantë Louis Vuitton, pastaj vjen e ndan me Altin Dumanin.
Po, po, janë të vërteta këto.
E thekson, Louis Vuitton e don, kurse ai i thotë për kë e don, e kuptoni vetë ju....
Pra, kjo është për qytetarët tanë. Koreanët kanë një nga standardet më të larta në botë dhe e vërteta është se pas problemeve që kanë pasur në vitet e pasluftës, janë një demokraci, kanë arritur në mënyrë evolutive të vendosen si një demokraci.
Dhe për çantën Christian Dior të Zonjës së Parë u krijua ajo që nuk kishte ndodhur kurrë.
Po të jetë për çantën, ju garantoj se çantat e ministreve, për të mos thënë pastaj ca drejtoreshave, janë të paktën 3 herë më të kushtueshme se çanta e Zonjës së Parë të Koresë së Jugut.
Prandaj duhet të fotografohen sa më shumë të gjitha objektet, se unë e kam theksuar se aty hyn si një sallon mode dhe jo si në parlament çka unë e ndjej veten jo mirë.
Por dhe ju gazetarëve ju ftoj në emër të interesit publik të fotografoni sa më shumë çantat e tyre.