Kongresmeni amerikan Juan Vargas (D-California) është bërë pjesë e Komitetit të Çështjeve Shqiptaro-Amerikane, duke sjellë një mbështetje të rëndësishme për komunitetin shqiptaro-amerikan.

Në një mesazh të veçantë, Vargas kujtoi lidhjen e tij me shqiptarët, që nis qysh në vitin 1999, kur ai hapi derën e shtëpisë së tij për një familje refugjate kosovare gjatë luftës. Ai ka qenë gjithashtu një zë i fortë për të mbijetuarit e dhunës seksuale të kohës së luftës, duke dëshmuar angazhim të thellë për të drejtat e njeriut dhe drejtësinë.

Kjo nismë mbështetet edhe nga organizata Albanians for America, një komitet politik (PAC) i themeluar për të forcuar marrëdhëniet mes SHBA-së dhe Shqipërisë e Kosovës, për të mbështetur pavarësinë e Kosovës dhe për të mbrojtur të drejtat e shqiptarëve kudo që jetojnë. Përmes përfshirjes së figurave si Kongresmeni Vargas, ky koalicion dypartiak po rritet dhe po bëhet gjithnjë e më i rëndësishëm në politikën amerikane.

“Jam krenar që i bashkohem Komitetit të Çështjeve Shqiptaro-Amerikane dhe që do të punoj për të forcuar marrëdhëniet mes SHBA-së dhe komunitetit shqiptar, si edhe për të mbrojtur vlerat e demokracisë dhe lirisë,” u shpreh Vargas në videomesazhin e tij.

Ky hap shihet si një tregues i fuqisë në rritje të komunitetit shqiptaro-amerikan dhe i rolit që organizata Albanians for America po luan në politikën amerikane.