Vendimet për shaktërrimin e të ardhmes së Tiranës, që parashikojnë betonizimin e “Parkut Rinia” dhe shembjen e Teatrit u morën sot në shkelje të ligjit. Erjon Veliaj për të arritur kuorumin, përdori 6 anëtarët e Këshillit Bashkiak të pezulluar me vendim të Gjykatës Administrative. Ky është një vendim i marrë që prej muajit shkurt i cili shpall nul vendimmarrjen e Veliajt për rritjen e çmimit të ujit dhe të gjitha vendimet e marra nga korriku i 2017-ës.

Ky vendim e ka lënë Partinë Socialiste dhe Erion Veliajn në Këshillin Bashkiak të Tiranës në minorancë.

Ditën e  sotme Këshilltarët e PD-së dhe të LSI-së braktisën mbledhjen, teksa thanë se Erion Veliaj nuk ka votat e mjaftueshme për të kaluar vendimet.

Vendimi i Parë: Betonizimi i Parkut te Taivani

Sot ishte parashikuar kalimi i vendimit për të betonizuar “Parkun Rinia”, që i lejon biznesit ndërtimin e lokaleve dhe qendrave tregëtare. Vendim ky që ligji parashikon të merret me 3/5 e votave në Këshill.  

Vendimi i dytë: Prishja e Teatrit Kombëtar

Pikë tjetër e nxehtë në rendin e ditës së sotme ishte ajo që kërkon përcaktimin e procedurës për negocimin me zhvilluesit privat për marrveshje të sipërmarrjes/shkëmbimit për pronat e Bashkisë së Tiranës. Kjo sipas këshilltarëve të opozitës bëhet për të përshpejtuar procedurat për tjetërsimin e hapësirave të Teatrit Kombëtar, duke ia kaluar një kompanie private.