Kryetari i Grupit Parlamentar të PD-së, Edmond Spaho, i futuar në studion e emisiionit “opinion” në televizionin “News24” ka deklaruar se opozita është e vendosur për mosbindje civile dhe në krah të qytetarëve.

“Nesër do të ketë mosbindje civile, do të jemi në krah të qytetarëve.  Në Kukës u protestua për bukën e gojës”, tha Spaho

Ai u shpreh se vendimi i Gjykatës ishte arbitrar, pasi nuk u mor në konsideratë fakti se arrestimi i qytetarëve u bë në kundërshtim me ligjin, në orët e para të mëngjesit. Ai tha se ata u morën pa këpucë nga banesat e tyre, dhe u dhunuan.

“Gjatë zhvillimit të gjyqit rrethuan gjysmën e vendit me polici, diktaturë është kjo. Në gjykatë u ushtrua dhunë nga policia. Të gjithë janë arrestuar në datën 31 pas orës 02:00 të mëngjesit, i kanë marrë pa këpucë, në sy të fëmijëve, i kanë dhunuar, dhe i kanë sjellë në Tiranë. Duhet në radhë të parë të shohësh pamjet, të përgatisësh provat dhe pastaj të lëshosh urdhër-arrestet. Për asnjërin nga ata 23 të arrestuarit nuk ka urdhër arreste personale. Protestuesit u provokuan, o goditën me shkop gomë, madje u goditën me gurë, a keni dëgjuar të procedohet ndonjë polic. Pse procedohen vetëm qytetarët. Ky është shteti? Lënë të lirë trafikantët, dhe arrestojnë ata që janë pa para, pa bukë”, u shpreh Spaho.