Ish-kryemnistri Berisha ka paralajmëruar në emisionin 360Gradë atë që ai e quajti furtunë të opozitës kundër Ramës. Sipas tij , shqiptarët do të njihen me lëvizjen e Partisë Demokratike, që do t’i hapë rrugën zgjedhjeve. “Opozita po përgatit një furtunë. Pa stuhi nuk ka zgjedhje. Stuhia e Partisë Demokratike dhe opozitës do kthjellojë mjegullën e shqiptarëve.” tha Berisha.

Ai u pyet edhe për afrimet e të pakënaqurve në Partinë Demokratike. Berisha zbuloi një detaj nga mbledhja e Grupit Parlamentar Demokrat. Sipas tij dje u dha urdhër për të afruar të gjitthë kontribuuesit e PD-së ndër vite. “Kuvendi miratoi një statut në të cilin një pjesë e mirë e propozimeve janë të ardhura nga grupet e interesit. Secili demokrat duhet të ketë në fokusin e tij rrëzimin e Edi Ramës. PD nuk ka luksin të humbasë asnjë. Dje u dha porosi për afrimin e të gjithë kontribuuesve në PD. Secili duhet të bëjë një hap mbrapa në qëndrimin e tij. Sepse rreziku i Ramës është një motiv për të gjithë. Beteja për bashkimin e PD duhet të vazhdojë” tha Berisha.