Në një kohë që ka pasur një valë largimesh nga vendi të mjekëve të kualifikuar, kryeministri Rama gjen raste dhe të mjekëve që kanë lënë Gjermaninë për të punuar në spitalin e Peshkopisë.

Kjo ka qenë rubrika e tij e ‘mirëmëngjesit’ ditën e sotme teksa thotë se janë 13 mjekë që kanë lënë Gjermaninë për të ardhur për të punuar në vendin tonë, kundrejt bonusit të dhënë nga ana e qeverisë.

‘’MIRËMËNGJES, dhe me këtë shembull, ndër 13 të tjerë deri më tani, të mjekut anestezist-reanimator që la Gjermaninë për spitalin e Peshkopisë, falë programit të ri të qeverisë, Bonus për Mjekët Specialistë jashtë Tiranës, ju uroj një javë të mbarë”, shkruan Rama.

Po historia nuk është tamam kështu siç e thotë kryeministri Rama, pasi vetë mjeku mjeku Fatmir Xhemali shprehet se ka ardhur në Shqipëri për shkak të arsyeve familjare. Dhe më tej ai tregon se ka përfituar edhe bonusin.

Ai thotë se prej Gjermanisë ka marrë një eksperiencë më të mirë, dhe pret që këta të vërë në zbatim dhe për qytetarët e Peshkopisë.

“Jam Fatmir Xhemali, kam qenë me kontratë në dy lande të Gjermanisë, eksperienca nuk diskutohet, kam përfituar shumë eksperiencë të qënësishme në punën time, në anestezi. Ishin arsyet familjare që erdha por edhe joshja nga ministria e Shëndetësisë për bonusin, fillim i mirë do të thoja për mjekët, të tjerat, duke ardhur, duke bërë. Më lavdëroi shumë Dibrën një mjek kardiolog, mik i imi, për mua është shumë e rëndësishme ku punoj dhe të them të drejtën më doli më mirë se e kisha parashikuar”, thotë mjeku. /Faxweb/