Manchester Unitedi pritet të dënohet nga UEFA pasi u vonua për ndeshjen e Ligës së Kampionëve ndaj Valencias të martën mbrëma.

Autobusi i Unitedit ngeci në trafikun e qytetit të Manchesterit, ndërsa Jose Mourinho fajësoi policinë për refuzimin që të shoqërojë autobusin deri te stadiumi Old Trafford.

Policia e Manchesterit ka insistuar se mund të bëjnë eskortë të autobusit vetëm nëse lojtarët janë të rrezikuar dhe një gjë e tillë nuk ishte paralajmëruar edhe për ndeshjen e së martës.

Fillimi i ndeshjes u shty për pesë minuta dhe UEFA ka marrë vendim për dënim edhe pse ishte pajtuar që ndeshja të shtyhet për minutat e kërkuar.