Hetimit Tatimor i Anglisë ka bërë të ditur se është duke zhvilluar një hetim për 44 klube dhe 171 lojtarë të përfshirë në nivelet e ndryshme të futbollit në Angli, për shkak se ata i janë shmangur pagimit të taksave.

Mësohet se autoritetet në Britani të Madhe kanë bllokuar rreth 374 milionë euro nga mos pagimi i taksave nga personat e përfshirë në industrinë e futbollit që prej sezonit 2015/2016.

Hetimit Tatimor i Anglisë e ka konfirmuar se është duke hetuar 44 klube angleze, 171 futbollistë si dhe 31 agjentë. Ky numër ka pësuar rritje të madhe në krahasim me shtatorin e kaluar, kur nën hetim ishin 90 futbollistë, 38 klube dhe 13 agjentë.

“Ne jemi duke i analizuar me kujdes marrëveshjet individuale mes klubeve të futbollit dhe lojtarëve të tyre për t’u siguruar se ata po i përmbahen rregullave në Britani të Madhe”, ka thënë zëdhënësi për media i Doganës. Për momentin, jemi duke hetuar rastet e 171 futbollistëve, 44 klubeve të futbollit dhe 31 agjentëve për disa probleme të ndryshme, përfshirë këtu edhe abuzimin e të drejtave të imazhit”.

Ky autoritet dyshon se klubet dhe futbollistët kanë shfrytëzuar të drejtat e imazhit për të mos i paguar taksat. Që nga viti 2000, futbollistët e kanë pasur mundësinë t’i trajtojnë paratë e fituara nga të drejtat e imazhit si të veçanta nga paratë e fituara nga klubet.